मदतीचे आमिष दाखवून अनाथ-गरीब कुटुंबातील अल्पवयीन मुलींची दीड लाखात खरेदी-विक्री; लखनौमध्ये तिघांना अटक

असा उघडकीस आला प्रकार

१२ मे रोजी मोहनलालगंज पोलीस ठाण्याच्या हद्दीतील गणिहार गावातून १६ आणि १२ वर्षांच्या दोन सख्ख्या अल्पवयीन बहिणी अचानक बेपत्ता झाल्या होत्या. त्यांच्या आजीने पोलिसांत तक्रार दाखल केली की, त्यांच्या एका अल्पवयीन नातेवाईकाने आणि प्रिया पटेल नावाच्या महिलेने मुलींना त्यांच्या आईला भेटवण्याच्या बहाण्याने नेले आहे. या तक्रारीनंतर पोलिसांनी तातडीने गुन्हा दाखल करून मुलींचा शोध सुरू केला.

१५० सीसीटीव्ही आणि तांत्रिक तपासाने लावला छडा

मुलींचे मोबाईल फोन बंद असल्याने पोलिसांसमोर मोठे आव्हान होते. उपायुक्त (लखनौ दक्षिण) अमित कुमार आनंद यांनी सांगितले की, मुलींचा शोध घेण्यासाठी पोलिसांची ४ पथके तयार करण्यात आली होती. पोलिसांनी तब्बल १५० सीसीटीव्ही कॅमेऱ्यांचे फुटेज तपासले आणि गुप्तहेरांच्या मदतीने १८ मे रोजी दोन्ही मुलींची सुखरूप सुटका केली. मुलींच्या जबाबातून या मोठ्या रॅकेटचा खुलासा झाला.

अशी होती गुन्ह्याची पद्धत

ही टोळी अशा मुलींना शोधायची ज्यांनी आपले आई-वडील गमावले आहेत किंवा ज्यांची आर्थिक परिस्थिती अत्यंत हलाखीची आहे, जेणेकरून त्यांचे कुटुंब पोलिसांत तक्रार करणार नाही. मुलींना नवीन कपडे, फिरायला नेणे किंवा नातेवाईकांना भेटवण्याचे आमिष दाखवून जाळ्यात ओढले जायचे. मुलींना आधी रायबरेली येथे आणले जायचे. तिथे त्यांचे फोटो काढून व्हॉट्सॲपद्वारे राजस्थानमधील कोटा येथील दलाल सोनम आणि तिचा पती भूपेंद्र चौधरी यांना पाठवले जायचे. फोटो पसंत पडल्यास १ ते दीड लाख रुपयांमध्ये सौदा ठरवला जात असे.

आरोपींची ओळख आणि अटक

याप्रकरणी पोलिसांनी अनुराग यादव (२५), मोहम्मद अख्तर (३२) आणि प्रिया पटेल उर्फ ​​शीला (२३) यांना ३ जून रोजी अत्रोली क्रॉसिंगजवळून अटक केली. मुख्य आरोपी प्रिया पटेल हिने चौकशीत कबुली दिली की, २०२० मध्ये तिची भेट राजस्थानमधील सोनमशी झाली होती. सोनमनेच तिला गरीब मुलींना लग्नासाठी राजस्थानमध्ये पाठवल्यास मोठे कमिशन देण्याचे आमिष दाखवले होते. या टोळीने यापूर्वीही रायबरेलीतील दोन बहिणींना अशाच प्रकारे राजस्थानमध्ये विकल्याचे समोर आले आहे. पोलीसांनी गुन्ह्यात वापरलेली दोन चारचाकी वाहने जप्त केली असून, राजस्थानमधील त्यांच्या साथीदारांचा शोध घेण्यासाठी पुढील तपास सुरू आहे.