रुग्णवाहिका मिळाली नाही, महिलेने रिक्षातच दिला चार बाळांना जन्म; पण दुर्दैवाने एकही वाचला नाही

या केंद्रात प्राथमिक उपचार केल्यानंतर या महिलेला बिछियामधील सामुदायिक आरोग्य केंद्रात जाण्याचा सल्ला दिला गेला. दरम्यान, सामुदायिक आरोग्य केंद्रात पोहोचण्यापूर्वीच रजनी यांनी रिक्षातच चार मुलांना जन्म दिला.

सामुदायिक रुग्णालयातील डॉक्टरांनी सांगितले की, रुग्णालयात येण्याआधीच चारही मुले दगावली होती. रजनी यांना रुग्णालयात उपचारासाठी दाखल करून घेतले असून त्यांची प्रकृती आता स्थिर आहे. स्थानिक माध्यमांशी बोलत असताना रजनी म्हणाल्या की, आम्ही सकाळी ८ वाजता घर सोडले होते. चार बाळांपैकी तीन मुले आणि एक मुलगी होती.

रजनी यांचे पती धनेश म्हणाले की, माझी पत्नी सहा ते सात महिन्यांची गर्भवती होती. पण वेळेत रुग्णवाहिका न मिळाल्यामुळे आम्हाला नाईलाजाने रिक्षातून रुग्णालयात जावे लागले. रस्त्यातच तिची प्रसूती झाल्यामुळे आमची चारही बालके दगावली.

बिछिया ब्लॉकचे वैद्यकीय अधिकारी डॉ. अनुप कुमार भारती म्हणाले की, महिला ३० आठवड्यांची गर्भवती होती. चारही बालके वेळेआधी जन्माला आली होती. नवजात बालके अविकसित आणि जन्मावेळी त्यांचे वजन खूपच कमी होते. रुग्णालयात येण्यापूर्वीच त्यांची प्रसूती झाली होती. रजनी यांच्यावर उपचार करण्यात आले असून त्यांची प्रकृती आता स्थिर आहे.

मांडला जिल्ह्याचे वरिष्ठ वैद्यकीय अधिकारी म्हणाले की, चार मुलांचे वजन प्रत्येकी दीड किलो होते. वेळेपूर्वीच प्रसूती झाल्यामुळे ज्या अडचणी निर्माण झाल्या त्यात त्यांचा मृत्यू झाला. कुटुंबाने मात्र याचे खापर रुग्णवाहिकेवर फोडले. वेळेत रुग्णवाहिका मिळू शकली असती तर कदाचित चार मुलांचा जीव वाचू शकला असता, असे कुटुंबियांनी सांगितले.