ममता बॅनर्जी दुहेरी संकटात; पक्षात अंतर्गत बंडखोरी, तर भडकाऊ भाषणाप्रकरणी FIR दाखल

काय आहे संपूर्ण प्रकरण?

तुषार कांती दास नावाच्या व्यक्तीने ममता बॅनर्जी यांच्याविरोधात तक्रार दाखल केली आहे. तक्रारीनुसार, ९ मार्च रोजी कोलकाता येथील धरणा मंचावर ममता बॅनर्जी यांनी एक भाषण केले होते. या भाषणामध्ये त्यांनी जनतेची दिशाभूल करणारी आणि प्रक्षोभक विधाने केल्याचा आरोप आहे. यामुळे शांतता भंग होऊ शकते आणि जातीय सलोखा धोक्यात येऊ शकतो, असे तक्रारदाराने म्हटले आहे. तसेच हे भाषण राज्याच्या लोकशाही रचनेला आव्हान देणारे होते, असाही आरोप करण्यात आला आहे.

पोलिसांनी सांगितले की, सध्या या प्रकरणाचा तपास प्राथमिक टप्प्यात आहे. “आम्हाला तक्रार मिळाली असून कायदेशीर प्रक्रियेनुसार गुन्हा दाखल करण्यात आला आहे. भाषणाचा संदर्भ आणि त्यामागील सर्व बाजूंची कसून चौकशी केली जात आहे,” असे एका वरिष्ठ पोलिस अधिकाऱ्याने स्पष्ट केले.

कारवाई राजकीय हेतूने

नुकत्याच झालेल्या विधानसभा निवडणुकीच्या निकालानंतर पश्चिम बंगालमधील राजकीय वातावरण आधीच तापले आहे. त्यातच या नव्या गुन्ह्यामुळे तणाव आणखी वाढला आहे. विरोधकांनी या कारवाईचे स्वागत केले असून, कायदा आणि सुव्यवस्था राखण्यासाठी हे आवश्यक पाऊल असल्याचे म्हटले आहे. दुसरीकडे, तृणमूल काँग्रेसने हा गुन्हा ‘राजकीय सूडबुद्धीने’ दाखल करण्यात आल्याचा आरोप केला आहे. पक्षाच्या नेतृत्वाला जाणीवपूर्वक लक्ष्य केले जात असल्याचे टीएमसीचे म्हणणे आहे.

‘टीएमसी’मध्ये अंतर्गत बंडखोरीचे संकट

हा कायदेशीर झटका अशा वेळी बसला आहे, जेव्हा तृणमूल काँग्रेस स्वतः मोठ्या अंतर्गत संकटाचा सामना करत आहे. विधानसभा निवडणुकीतील पराभवानंतर पक्षाच्या खासदारांमध्ये आणि आमदारांमध्ये मोठी बंडखोरी पाहायला मिळत आहे.

टीएमसीच्या १९ खासदारांच्या स्वाक्षऱ्या असलेले एक पत्र लोकसभा अध्यक्ष ओम बिर्ला यांच्याकडे आल्याची माहिती आहे. यामध्ये बारसातच्या खासदार काकोली घोष दस्तीदार यांच्या नेतृत्वाखाली वेगळा गट तयार करण्याची आणि भाजपच्या नेतृत्वाखालील ‘एनडीए’ला पाठिंबा देण्याची मागणी करण्यात आली आहे.

यापूर्वी विधानसभेतही पक्षाच्या ८० पैकी ५८ आमदारांनी पक्षाच्या अधिकृत उमेदवाराऐवजी, पक्षातून हकालपट्टी झालेल्या रिताब्रता बॅनर्जी यांना विरोधी पक्षनेते म्हणून पाठिंबा दिला होता. या अंतर्गत वाढत्या वादामुळे ममता बॅनर्जी यांनी ५ जून रोजी पक्षाच्या सर्व समित्या बरखास्त करून नवीन संघटनात्मक रचनेची घोषणा केली होती. आता एकीकडे पोलिसांचा तपास आणि दुसरीकडे पक्षातील अंतर्गत बंडखोरी, अशा दुहेरी संकटात ममता बॅनर्जी आणि त्यांचा पक्ष अडकला आहे.