आज निवडणुका झाल्यास NDA ला ‘इतक्या’ जागांचा अंदाज; भाजपाला फटका, काँग्रेसची मोठी झेप! MOTN सर्वेक्षणात काय समोर आलं?

जागा घटल्या, तरी बहुमत भक्कम

ऑगस्ट २०२६ च्या या सर्वेक्षणाअनुसार, एनडीएला ३२६ जागा मिळण्याचा अंदाज व्यक्त करण्यात आला आहे. जानेवारी २०२६ मध्ये झालेल्या सर्वेक्षणात एनडीएला ३५२ जागा मिळतील, असा अंदाज वर्तवण्यात आला होता. म्हणजेच गेल्या सहा महिन्यांत एनडीएच्या २६ जागा कमी झाल्या आहेत. २०२४ च्या लोकसभा निवडणुकीत भाजपाने दिलेल्या ‘४०० पार’च्या घोषणेपासून हा आकडा दूर असला, तरी मतदारांचा एनडीएवरील विश्वास अजूनही कायम असल्याचे स्पष्ट होते.

दुसरीकडे, विरोधकांच्या ‘इंडिया’ (INDIA) आघाडीला या सर्वेक्षणात फार मोठा फायदा होताना दिसत नाही. ‘इंडिया’ आघाडीला १८५ जागा मिळतील असा अंदाज आहे. जानेवारी २०२६ मधील सर्वेक्षणात हा आकडा १८२ होता. २०२४ च्या निवडणुकीत ‘इंडिया’ आघाडीने २३४ जागा जिंकत एनडीएला कडवी झुंज दिली होती, त्या तुलनेत आघाडीची कामगिरी घसरल्याचे दिसते.

भाजपाला फटका, काँग्रेसची मोठी झेप

पक्षांनुसार आकडेवारी पाहिल्यास भाजप आणि काँग्रेसच्या आलेखात मोठा बदल दिसतो:

• भाजपा: आज निवडणुका झाल्यास भाजपाला स्वबळावर २६१ जागा मिळू शकतात. जानेवारी २०२६ मध्ये हा अंदाज २८७ जागांचा होता. म्हणजेच भाजप बहुमताच्या २७२ या जादुई आकड्याच्या खाली आला आहे. तरीही २०२४ मध्ये जिंकलेल्या २४० जागांपेक्षा ही संख्या जास्त आहे. पेपरफुटीचे प्रकरण आणि शिक्षण क्षेत्रातील गोंधळामुळे तरुण वर्ग (Gen Z) नाराज असल्याचा फटका भाजपाला बसल्याचे विश्लेषकांचे म्हणणे आहे.
• काँग्रेस: राहुल गांधी यांच्या आक्रमक रणनीतीमुळे काँग्रेसचा आलेख सुधारताना दिसत आहे. ताज्या सर्वेक्षणानुसार काँग्रेसला १०६ जागा मिळण्याचा अंदाज आहे. जानेवारी महिन्यात काँग्रेसला केवळ ८० जागा मिळतील असा अंदाज वर्तवण्यात आला होता. महिला आरक्षण आणि विद्यार्थी आंदोलनावरील पोलीस कारवाई यांसारख्या मुद्द्यांवरून काँग्रेसने निर्माण केलेल्या वातावरणाचा फायदा पक्षाला होताना दिसत आहे.

मतांची टक्केवारी कोणाला किती?

मतटक्केवारीचा विचार केल्यास, एनडीएच्या मतांमध्ये किरकोळ घट झाली आहे. जानेवारीतील ४७% वरून एनडीएची मतटक्केवारी ४५.१% वर आली आहे. तरीही २०२४ च्या निवडणुकीत मिळालेल्या ४४% मतांपेक्षा ही टक्केवारी जास्त आहे. दुसरीकडे, ‘इंडिया’ आघाडीला ३९.१% मते मिळण्याचा अंदाज वर्तवण्यात आला असून, त्यात जानेवारीच्या तुलनेत (३९%) अतिशय सूक्ष्म वाढ झाली आहे.

(टीप: ‘मूड ऑफ द नेशन’ हा इंडिया टुडे आणि सी-व्होटरचा द्वैवार्षिक सर्व्हे आहे. ऑगस्ट २०२६ च्या या सर्व्हेसाठी १ जुलै ते २५ ऑगस्ट दरम्यान २५,१८४ लोकांची प्रत्यक्ष मुलाखत घेण्यात आली, तर गेल्या सहा महिन्यांतील ९१,७९५ लोकांच्या विश्लेषणाचाही यात समावेश आहे.)