Nalanda Temple Stampede: बिहारच्या नालंदामध्ये चेंगराचेंगरी, माता शीतला मंदिरात भीषण दुर्घटना; ८ महिला भाविकांचा मृत्यू

नेमकी घटना काय?

मिळालेल्या माहितीनुसार, मंगळवारचा दिवस असल्याने माता शीतला देवीच्या दर्शनासाठी पहाटेपासूनच भाविकांनी मोठी गर्दी केली होती. मंदिराच्या मर्यादित जागेत क्षमतेपेक्षा जास्त लोक जमल्यामुळे गोंधळ निर्माण झाला. गर्दीवर नियंत्रण मिळवणे कठीण झाल्याने अचानक चेंगराचेंगरी सुरू झाली. यामध्ये अनेक महिला भाविक खाली पडल्या आणि गर्दीच्या पायाखाली चिरडल्या गेल्या.

घटनेची माहिती मिळताच स्थानिक पोलीस प्रशासन आणि गावकऱ्यांनी तातडीने बचाव कार्य हाती घेतले. जखमींना जवळच्या रुग्णालयात दाखल करण्यात आले असून, मृतांचा आकडा वाढण्याची भीती व्यक्त केली जात आहे.

सरकारकडून चौकशीचे आदेश

या भीषण दुर्घटनेची दखल घेत बिहार सरकारने मुख्य सचिवांना सखोल चौकशीचे निर्देश दिले आहेत. “मंदिरात ही परिस्थिती का उद्भवली आणि सुरक्षिततेच्या उपाययोजना का अपुऱ्या पडल्या, याचा तपास केला जाईल,” असे प्रशासनाकडून सांगण्यात आले. तसेच जखमींना योग्य आणि मोफत वैद्यकीय उपचार मिळावेत यासाठी कडक सूचना जारी करण्यात आल्या आहेत.

उपमुख्यमंत्र्यांनी व्यक्त केला शोक

बिहारचे उपमुख्यमंत्री सम्राट चौधरी यांनी या घटनेबद्दल तीव्र दुःख व्यक्त केले आहे. त्यांनी ‘एक्स’ (पूर्वीचे ट्विटर) वर पोस्ट करत म्हटले की, “नालंदा येथील माता शीतला मंदिरात झालेली भीषण चेंगराचेंगरीची घटना अत्यंत हृदयद्रावक आहे. सरकार पीडित कुटुंबांच्या पाठीशी खंबीरपणे उभे आहे. मृतांच्या आत्म्यास शांती लाभो आणि जखमींनी लवकर बरे व्हावे, हीच प्रार्थना.”

धार्मिक स्थळांवरील सुरक्षेचा प्रश्न पुन्हा ऐरणीवर

धार्मिक स्थळांवर गर्दीमुळे होणाऱ्या दुर्घटनांची मालिका थांबण्याचे नाव घेत नाहीये. गेल्या वर्षी देखील आंध्र प्रदेशातील श्रीकाकुलम येथील श्री व्यंकटेश्वर स्वामी मंदिरात एकादशीच्या मुहूर्तावर अशाच प्रकारची चेंगराचेंगरी झाली होती, ज्यात नऊ जणांना आपला जीव गमवावा लागला होता.

नालंदा येथील या घटनेने पुन्हा एकदा मोठ्या धार्मिक मेळाव्यांमधील गर्दी व्यवस्थापन आणि आपत्कालीन नियोजनावर प्रश्नचिन्ह उपस्थित केले आहे. सध्या परिसरात तणावाचे वातावरण असून, प्रशासनाकडून मंदिरात सामान्य स्थिती पूर्ववत करण्याचे प्रयत्न सुरू आहेत.