देशभरात एकीकडे ‘नीट’ परीक्षेच्या निकालाची उत्सुकता आणि धाकधूक शिगेला पोहोचलेली असतानाच, हरियाणामधून एक अत्यंत धक्कादायक आणि मन हेलावून टाकणारी घटना समोर आली आहे. परीक्षेचा निकाल जाहीर होण्यास अवघे काही तास शिल्लक असताना, फरिदाबादमध्ये एका १८ वर्षीय विद्यार्थिनीने इमारतीच्या १६ व्या मजल्यावरून उडी मारून आत्महत्या केली.

मिळालेल्या माहितीनुसार, ऑनलाईन जाहीर झालेल्या उत्तरतालिकेवरून स्वतःच्या गुणांचा अंदाज लावल्यानंतर ही विद्यार्थिनी प्रचंड मानसिक तणावाखाली होती, अशी माहिती तिच्या कुटुंबीयांनी दिली.

निकालाच्या काही तास आधीच उचललं टोकाचं पाऊल

ही दुर्दैवी घटना ग्रेटर फरिदाबादमधील सेक्टर ८८ मधील ‘एसआरएस रेसिडेन्सी’ या उच्चभ्रू निवासी सोसायटीमध्ये गुरुवारी दुपारच्या सुमारास घडली. मृत विद्यार्थिनी आपल्या कुटुंबासह याच सोसायटीत राहत होती. पोलिसांनी दिलेल्या माहितीनुसार, दुपारच्या सुमारास ती फ्लॅटमधून बाहेर पडली. तिने लिफ्टने इमारतीचा सर्वात वरचा मजला (१६ वा मजला) गाठला आणि तिथून थेट खाली उडी घेतली. या घटनेची माहिती मिळताच पोलिसांनी तात्काळ घटनास्थळी धाव घेत तपास सुरू केला. पोलिसांनी मृतदेह ताब्यात घेऊन शवविच्छेदनासाठी पाठवला आहे.

६०० गुण मिळूनही निराशा

मृत विद्यार्थिनीच्या कुटुंबीयांनी पोलिसांना सांगितले की, ती अभ्यासात अत्यंत हुशार होती. १२ वीच्या परीक्षेतही तिने उत्कृष्ट गुण मिळवले होते. तिला ‘नीट’ परीक्षेत खूप चांगल्या गुणांची अपेक्षा होती. मात्र, काही दिवसांपूर्वी ऑनलाईन जाहीर झालेली Answer Key तपासून जेव्हा तिने स्वतःच्या गुणांचा अंदाज लावला, तेव्हा तिला ७२० पैकी ६०० च्या आसपास गुण मिळत असल्याचे स्पष्ट झाले.

अनेकांसाठी ६०० गुण हा चांगला स्कोअर असला, तरी तिच्या अपेक्षेपेक्षा हे गुण कमी असल्याने ती प्रचंड निराश झाली होती. गेल्या काही दिवसांपासून ती या संभाव्य निकालामुळे कमालीच्या मानसिक तणावाखाली वावरत होती, अशी माहिती तिच्या वडिलांनी पोलिसांना दिली.

हेही वाचा

मूळचे आंध्र प्रदेशचे कुटुंब

हे कुटुंब मूळचे आंध्र प्रदेशातील विजयवाडा येथील रहिवासी असून गेल्या काही काळापासून फरिदाबादमध्ये राहत आहे. घटनेच्या वेळी विद्यार्थिनीची आई विजयवाडा येथे गेली होती. तिचे वडील कोटेश्वर हे एका खाजगी कंपनीत वरिष्ठ पदावर कार्यरत आहेत. त्यांनी पोलिसांना सांगितले की, मृत मुलगी ही त्यांची मोठी मुलगी होती. याप्रकरणी पोलीस सध्या सर्व बाजूंनी तपास करत आहेत.

नीट २०२६ चा निकाल: ११ लाखांहून अधिक विद्यार्थी पात्र

दरम्यान, नॅशनल टेस्टिंग एजन्सीने (NTA) गुरुवारी देशातील वैद्यकीय, दंतवैद्यकीय, आयुष आणि संबंधित आरोग्य विज्ञान अभ्यासक्रमांच्या प्रवेशासाठी घेतलेल्या ‘नीट यूजी २०२६’ चा निकाल अधिकृतपणे जाहीर केला.

हेही वाचा

या वर्षी देशभरातून ११ लाख २१ हजारांपेक्षा जास्त विद्यार्थी या प्रवेश परीक्षेसाठी पात्र ठरले आहेत.

  • एकूण १३८ विद्यार्थ्यांनी ७२० पैकी ६९० पेक्षा जास्त गुण मिळवले आहेत.
  • ६९० हून अधिक गुण मिळवणाऱ्यांमध्ये तब्बल ९३ टक्के विद्यार्थी हे पहिल्यांदाच ही परीक्षा देणारे आहेत.
  • तर यातील ९९ टक्के विद्यार्थी हे १७ ते १९ वयोगटातील आहेत.

पेपर फुटीच्या वादानंतर पुन्हा झाली होती परीक्षा

यंदाची ‘नीट’ परीक्षा सुरुवातीपासूनच वादाच्या भोवऱ्यात राहिली होती. पेपर फुटीच्या (Paper Leak) गंभीर आरोपांनंतर मूळ परीक्षा रद्द करण्यात आली होती. त्यानंतर २१ जून रोजी ही परीक्षा पुन्हा घेण्यात आली, ज्यामुळे देशाच्या शिक्षण क्षेत्रातील सर्वात मोठ्या वादाला तोंड फुटले होते. अखेर काल या परीक्षेचा निकाल जाहीर झाला, मात्र त्यापूर्वीच फरिदाबादमधील या घटनेने स्पर्धा परीक्षांच्या तणावाचा प्रश्न पुन्हा एकदा ऐरणीवर आणला आहे.

महत्त्वाची सूचना: मानसिक तणाव किंवा नैराश्यासारख्या परिस्थितीत कोणत्याही टोकाच्या विचारांना बळी पडू नका. संकटसमयी किंवा नैराश्यात मदत मिळवण्यासाठी आणि समुपदेशनासाठी अधिकृत मानसोपचार तज्ज्ञ किंवा सरकारी हेल्पलाइनशी (जसे की ‘किरण’ हेल्पलाइन – 1800-599-0019) संपर्क साधा.