नागपूर : फेडरेशन ऑफ ऑल महाराष्ट्र पेट्रोल डिलर्स असोसिएशनने विविध मागण्यांसाठी ३१ मे रोजी पेट्रोल-डिझेल खरेदी बंद आंदोलनाची हाक दिली आहे. महाराष्ट्रासह देशातील १९ राज्यांत हे आंदोलन करण्यात येणार असून, उद्या खासगी पेट्रोल पंप कोरडे पडण्याची शक्यता वर्तवण्यात येत आहे. फेडरेशनच्या मते, ‘‘पेट्रोलियम डिलर्स वर्षांनुवर्षे देशाच्या अर्थव्यवस्थेसाठी राबत आहेत. नोटाबंदीसारख्या आव्हानात्मक निर्णयात आम्ही शासनाला पूर्ण सहकार्य केले. त्यानंतर प्रशासकीय चौकशीला आम्हाला सामोरे जावे लागले. करोनाकाळातही आम्ही जोखीम पत्करून सेवा दिली. गेल्या पाच वर्षांत आमच्या भांडवली गुंतवणुकीत दुपटीने वाढ झाली. मात्र, उत्पन्न वाढले नाही.’’ दरबदलाच्या चुकीच्या धोरणांमुळे आम्हाला अनेकदा मोठय़ा आर्थिक नुकसानीला सामोरे जावे लागते, असे पंप चालकांचे म्हणणे आह़े इंधन दरबदल करताना डिलर्सना कधीही विश्वासात घेतले जात नाही. त्यामुळे दर कमी झाल्यावर डिलर्सचे प्रचंड नुकसान होते. पेट्रोल पंप चालकांसाठी शासनाने एक धोरण तयार करण्याची गरज आहे. या मागणीसाठी ३१ मे २०२२ रोजी देशव्यापी खरेदी बंद आंदोलन पुकारण्यात आले आहे, असे या संघटनेने म्हटले आह़े दरम्यान, विदर्भ पेट्रोलियम डिलर्स असोसिएशनचे अध्यक्ष अमित गुप्ता म्हणाले, या दिवशी आमच्याकडील शिल्लक असलेले पेट्रोल व डिझेल विकले जाईल. साठा संपल्यावर ३१ मे रोजी एक दिवस कोणताही डिलर कंपनीकडून पेट्रोल-डिझेल खरेदी करणार नाही.
