पंतप्रधान मोदी हे अमेरिकेचे आज्ञाधारक सेवक- राहुल गांधी

अमेरिकेचे परराष्ट्रमंत्री मार्को रुबिओ यांनी परराष्ट्रमंत्री एस. जयशंकर यांच्याशी झालेल्या चर्चेत होर्मुझ सामुद्रधुनीतील अमेरिकेच्या नाकाबंदीचे उल्लंघन अथवा इराणी तेलाची बेकायदा वाहतूक खपवून घेतली जाणार नाही, असा इशारा दिला होता. त्यानंतर राहुल गांधी यांनी समाजमाध्यमावरील संदेशामध्ये मोदी यांच्या भूमिकेचा समाचार घेतला. ‘तीन भारतीय खलाशांचा मृत्यू होऊन काही दिवस उलटले तरी अमेरिकेकडून ना खेद व्यक्त करण्यात आला, ना माफी मागण्यात आली. उलट अमेरिकेकडून आदेश दिले जात आहेत. एखादा सार्वभौम राष्ट्र अशा भाषेला कधीही सहन करणार नाही. मात्र आपल्या तडजोड झालेल्या पंतप्रधानांनी यावर मौन बाळगले असून ते अमेरिकेचे आदेश पाळत आहेत,’ अशी टीका गांधी यांनी केली.

दरम्यान, ओमानमधील दुक्म बंदरात उभ्या असलेल्या ‘एमटी सेलेस्टियल’ या जहाजावरील भारतीय अधिकारी निशांत उर्थानाथन यांच्या मृत्यूचाही त्यांनी संदेशात उल्लेख केला. मृत अधिकार्‍याचा पार्थिव भारतात तातडीने आणावे, अशी मागणी त्यांनी केली. भारतीय दूतावासाने मात्र संबंधित व्यक्तीचा वैद्यकीय कारणांमुळे मृत्यू झाल्याचे स्पष्ट करत पार्थिव भारतात पाठविण्याची प्रक्रिया सुरू असल्याचे सांगितले आहे.