पंतप्रधान नरेंद्र मोदी ६ ते ११ जुलै २०२६ या कालावधीत इंडोनेशिया, ऑस्ट्रेलिया आणि न्यूझीलंडच्या सहा दिवसांच्या महत्त्वपूर्ण दौऱ्यावर रवाना झाले आहेत. भारताचे ‘ॲक्ट ईस्ट’ धोरण, ‘महासागर’ दृष्टीकोन आणि मुक्त इंडो-पॅसिफिक क्षेत्रातील प्राधान्य पुढे नेण्याचा या दौऱ्याचा उद्देश आहे.
पंतप्रधान मोदी म्हणाले, “माझा पूर्व आणि दक्षिण हिंद महासागरातील अनुक्रमे इंडोनेशिया आणि ऑस्ट्रेलियाचा दौरा आणि त्यानंतरचा न्यूझीलंडचा दौरा भारताच्या ‘ॲक्ट ईस्ट’ धोरणाला, ‘महासागर’ दृष्टीकोनाला, तसेच एका मुक्त आणि खुल्या इंडो-पॅसिफिक क्षेत्राविषयीच्या आमच्या दृष्टिकोनाला बळ देईल.”
इंडोनेशिया दौरा
दौऱ्याचा पहिला टप्पा इंडोनेशिया असून, ६ ते ८ जुलै दरम्यान पंतप्रधान मोदी राष्ट्राध्यक्ष प्रबोवो सुबियांतो यांची भेट घेतील. २०१८ नंतरची ही त्यांची पहिली द्विपक्षीय भेट आहे. या भेटीदरम्यान दोन्ही पंतप्रधान सुरक्षा, व्यापार आणि सांस्कृतिक सहकार्यावर चर्चा करतील. तसेच, प्रंबनन मंदिराला ते भेट देणार असून, इंडोनेशियातील भारतीय समुदायाशीही संवाद साधतील. युनेस्कोच्या जागतिक वारसा जागांमध्ये समाविष्ट असलेल्या या मंदिराचा उल्लेख पंतप्रधानांनी दोन्ही देशांमधील सांस्कृतिक संबंधांचे प्रतीक म्हणून केला.
ऑस्ट्रेलिया दौरा
दौऱ्याचा दुसरा टप्पा ऑस्ट्रेलियातील मेलबर्न येथे असेल. पंतप्रधान मोदी आणि ऑस्ट्रेलियाचे पंतप्रधान अँथनी अल्बानीज यांच्यात द्विपक्षीय चर्चा होईल. या चर्चेत संरक्षण आणि सुरक्षा, व्यापार आणि गुंतवणूक, शिक्षण, मोबिलिटी आणि दोन्ही देशांमधील संबंध मजबूत करण्यावर भर दिला जाईल. पंतप्रधान मोदी यांनी तिथल्या भारतीय समुदायाला दोन देशांमधील संबंधांचा एक ‘महत्त्वाचा आधार’ म्हटले आहे.
न्यूझीलंड दौरा
दौऱ्याचा शेवटचा टप्पा ऑकलंड (न्यूझीलंड) येथे असेल. पंतप्रधान क्रिस्टोफर लक्सन यांच्यासोबतच्या चर्चेत भारत-न्यूझीलंड मुक्त व्यापार करारानंतर दोन्ही देशांमधील आर्थिक, व्यापारी आणि व्यावसायिक सहभागाचे संबंध आणखी कसे वाढवता येतील, यावर दोन्ही पंतप्रधान चर्चा करतील. मार्च २०२५ मध्ये झालेल्या लक्सन यांच्या भारत भेटीनंतर निर्माण झालेली गती या भेटीतून अधिक वाढवण्याचा प्रयत्न असेल.
आमच्या द्विपक्षीय संबंधांमध्ये भारतीय समुदायाचे मोठे योगदान राहिले आहे आणि या दौऱ्या दरम्यान, सर्वच क्षेत्रांत उत्कृष्ट कामगिरी करणाऱ्या भारतीय समुदायाच्या एका मोठ्या मेळाव्याला संबोधित करण्यास मी उत्सुक आहे. – पंतप्रधान नरेंद्र मोदी</strong>
‘महासागर’ ही संकल्पना काय आहे?
‘महासागर’ ही भारत सरकारची एक महत्त्वपूर्ण संकल्पना असून, सागरी क्षेत्रातील सुरक्षा, स्थिरता आणि सर्वसमावेशक विकासासाठी ती अत्यंत आवश्यक आहे. हा दौरा भारताच्या याच भूमिकेला आंतरराष्ट्रीय स्तरावर अधिक बळ देणारा ठरणार आहे.
