PM Narendra Modi speaks with Bahrain King: पंतप्रधान नरेंद्र मोदी यांनी शुक्रवारी बहरीनचे राजे हमद बिन ईसा अल खलिफा यांच्याशी दूरध्वनीवरून संवाद साधला. यावेळी त्यांनी ईद-उल-फित्रच्या हार्दिक शुभेच्छा दिल्या तसेच पश्चिम आशियातील ऊर्जा आणि नागरी पायाभूत सुविधांवर झालेल्या हल्ल्यांचा तीव्र शब्दांत निषेध व्यक्त केला.
सोशल मीडिया प्लॅटफॉर्म ‘एक्स’वर मूळतः अरबी भाषेत शेअर केलेल्या पोस्टमध्ये पंतप्रधान मोदींनी या चर्चेला ‘फलदायी’ असे वर्णन केले आणि वाढत्या प्रादेशिक तणावाबद्दल सामायिक चिंता व्यक्त केली. “मी बहरीनचे राजे आणि तेथील जनतेला पवित्र ईद-उल-फित्रच्या निमित्ताने हार्दिक शुभेच्छा दिल्या,” असे त्यांनी नमूद केले.
हल्ल्यांचा निषेध
या संवादादरम्यान दोन्ही नेत्यांनी पश्चिम आशियातील सद्यस्थितीचा आढावा घेतला. या प्रदेशात वारंवार होणाऱ्या हल्ल्यांमध्ये ऊर्जा सुविधा आणि नागरी भागांना लक्ष्य केले जात असल्याबद्दल त्यांनी चिंता व्यक्त केली. दोन्ही बाजूंनी या हल्ल्यांचा निषेध करत अन्न, इंधन आणि खतांच्या जागतिक सुरक्षेवर होणाऱ्या गंभीर परिणामांवर भर दिला.
खत उत्पादन संकटात!
पश्चिम आशियातील वाढत्या संघर्षाच्या पार्श्वभूमीवर हा संवाद झाला. या संघर्षामुळे तेल आणि नैसर्गिक वायूच्या महत्त्वाच्या पायाभूत सुविधांवर हल्ले होत असून, त्यामुळे आंतरराष्ट्रीय पुरवठा साखळी धोक्यात येण्याची शक्यता निर्माण झाली आहे. खत उत्पादनासाठी आवश्यक असलेला मोठा नैसर्गिक वायूचा साठा या प्रदेशातून येत असल्याने परिस्थिती अधिक गंभीर बनत आहे.
‘होर्मुझ’वर चर्चा
आखाती देशांकडून ऊर्जा आयातीवर मोठ्या प्रमाणावर अवलंबून असलेल्या भारताने अन्न व ऊर्जा किमतींवरील संभाव्य परिणामांबाबतही चिंता व्यक्त केली आहे. पंतप्रधान मोदी आणि राजे हमद यांनी नौकानयनाचे स्वातंत्र्य अबाधित ठेवणे आणि सुरक्षित सागरी मार्ग कायम राखण्याचे महत्त्व अधोरेखित केले. होर्मुझच्या सामुद्रधुनीसारख्या सामरिक मार्गांच्या सुरक्षेचे जागतिक व्यापारासाठी असलेले महत्त्व त्यांनी यावेळी अधोरेखित केले.
समारोप करताना पंतप्रधान मोदींनी बहरीनमधील भारतीय समुदायाच्या सुरक्षेसाठी आणि कल्याणासाठी दिलेल्या सातत्यपूर्ण पाठिंब्याबद्दल बहरीनच्या राजांचे आभार मानले. ईदच्या पार्श्वभूमीवर आखाती देशांशी संवाद वाढवण्याच्या भारताच्या धोरणाचा हा एक भाग असल्याचे मानले जाते.
थायलंडच्या पंतप्रधानांचे अभिनंदन
दरम्यान, पंतप्रधान नरेंद्र मोदी यांनी थायलंडचे नवे पंतप्रधान अनुतिन चर्नविराकुल यांच्या निवडीबद्दल हार्दिक अभिनंदन व्यक्त केले आहे. यासंदर्भात त्यांनी सोशल मीडियावर पोस्ट करत म्हटले, “थायलंडच्या पंतप्रधानपदी अनुतिन चर्नविराकुल यांच्या निवडीबद्दल हार्दिक अभिनंदन. त्यांच्यासोबत जवळून काम करण्याची उत्सुकता आहे. भारत-थायलंड बहुआयामी सामरिक भागीदारी अधिक दृढ करण्यासाठी आपण एकत्रितपणे काम करू. आपले संबंध सामायिक सांस्कृतिक वारसा, घनिष्ठ संबंध आणि मजबूत लोक-ते-लोक नात्यांवर आधारित आहेत. दोन्ही देश शांतता, प्रगती आणि समृद्धीच्या समान ध्येयांसाठी कटिबद्ध आहेत.”
