“काळजी करु नका, मी तुमच्याबरोबर”, पंतप्रधान मोदींनी दिला तृणमूल आणि ठाकरे सेनेतून फुटलेल्या खासदारांना विश्वास

संसदेतील कोंडीवर व्यक्त केली चिंता

“नव्या सदस्यांसाठी ही बाब योग्य नाही, संसदेचे कामकाज सुरळीत चालायला हवं”, असेही पंतप्रधान नरेंद्र मोदी खासदारांशी संवाद साधताना म्हणाले. मोदींनी यावेळी खासदारांनी वाचन आणि अभ्यास करण्याचेही आवाहन केले शिवाय संसदेचा इतिहास समजून घेण्याचे आवाहन केले. “संसदेत ऐतिहासिक गोष्टींचा खजिना आहे, त्याचा चर्चा करण्यासाठी वापर करा. आपल्या राज्याचा विकास करण्यासाठी काम करा. राज्याचा विकास झाला तरच देशाचा विकास होईल”, असे पंतप्रधान मोदी यावेळी म्हणाले.

तृणमूल आणि उद्धव ठाकरेंच्या शिवसेनेतील बंडखोरांची हजेरी

पंतप्रधान मोदींनी साधलेल्या सकाळच्या संवादात एकूण ४५ खासदारांनी सहभाग घेतला होता. यावेळी एकनाथ शिंदेंच्या शिवसेनेचे ७, राष्ट्रीय सिटिझन पार्टीचे २० आणि अजित पवारांच्या राष्ट्रवादीच्या दोन खासदारही उपस्थित होते. काही दिवसांपूर्वी उद्धव ठाकरेंच्या शिवसेनेतून सहा खासदारांनी एकनाथ शिंदेंच्या शिवसेनेत प्रवेश केला. तर, तृणमूल काँग्रेसच्या २० खासदारांनी एनसीपीमध्ये प्रवेश केला आहे. हे खासदार देखील यावेळी उपस्थित होते. फुटीर खासदारांशी संवाद साधताना मोदींनी त्यांना दिलासा देण्याचा प्रयत्न केला.

मी तुमच्याबरोबर आहे – पंतप्रधान मोदींनी दिला विश्वास

शिवसेना आणि तृणमूलच्या बंडखोरांशी बोलताना मोदींनी, “मी तुमच्याबरोबर आहे, काळजी करु नका”, अशा शब्दात विश्वास दिला. “एनडीए हे एक कुटुंब आहे, छोट्या मोठ्या पक्षांनी एकत्र घेऊन ही युती झालीय. प्रत्येकाचा आदर राखला जाईल आणि त्याला संधी दिली जाईल. मी प्रत्येक खासदाराबरोबर आहे. युतीमधील प्रत्येक खासदारबरोबर मी आहे. तुम्हाला कोणाबद्दल काळजी करण्याची गरज नाही”, असे नरेंद्र मोदी म्हणाले. “मतदारसंघात कामं करण्यासाठी अधिकारांचा योग्य वापर करा”, अशी सूचना देखील पंतप्रधान मोदींनी यावेळी खासदारांना केली.

पंतप्रधान मोदींची सूचना

“तुमच्या भागात विकासाचे काही काम असल्यास पंतप्रधान कार्यालयास थेट संपर्क साधा. सर्वांच्या संपर्कात राहा, सर्वांना भेटा, गरीब कामगार, शेतकरी आणि सर्वांच्या समस्या जाणून घ्या”, अशी सूचना पंतप्रधान मोदींनी केली. समोर आलेल्या माहितीनुसार मोदींनी यावेळी प्रत्येक खासदाराशी स्वतंत्र संवाद साधून त्यांच्या तब्येतीची विचारपूस देखील केली. पक्षांतर्गत संवाद आणि समन्वय वाढविण्याचा या चर्चेमागील उद्देश असल्याचे सांगितले जाते.