‘सरफरोशी की तमन्ना…’; लष्कराच्या गोळीबारात ३७ मृत्यूंनंतर PoK मध्ये ‘इंकलाब जिंदाबाद’च्या घोषणा, पाकिस्तानी सरकारविरोधात आक्रोश

आंदोलकांकडून पाकिस्तान लष्कर, सरकारविरोधात घोषणाबाजी

पाकव्याप्त काश्मीरमधील आंदोलन दडपण्यासाठी लष्कराकडून सुरु असलेल्या प्रयत्नाविरोधात नागरिकांनी जोरदार विरोध करण्यास सुरुवात केली आहे. आंदोलकांनी सरविरोधात घोषणा देण्यासाठी “सरफरोशी की तमन्ना अब हमारे दिल में है, देखना है जोर कितना बाजु-ए-कातिल में है”, या भारताच्या स्वातंत्र्यसंग्रामातील क्रांतिकारक राम प्रसाद बिस्मिल यांच्या प्रसिद्ध काव्यरचनेची मदत घेतली.

‘इंकलाब जिंदाबाद’ची घोषणा

आंदोलकांकडून १९२१ मध्ये उर्दू कवी आणि स्वातंत्र्यसैनिक मौलाना हसरत मोहानी यांनी तयार केलेला “इंकलाब जिंदाबाद” ही घोषणा देखील दिली जात आहे. पाकव्याप्त काश्मीरमधील रावलकोट येथून एक व्हिडीओ समोर आला आहे. येथील एका बस स्थानकावर बसलेल्या आंदोलकांकडून “सरफरोशी की तमन्ना अब हमारे दिल में है…” च्या घोषणा दिल्या जात आहेत.

हिंसाचारात ३७ हून अधिक नागरिकांचा मृत्यू

पाकिस्तानी सुरक्षा दलांकडून आंदोलकांवर गोळीबार करण्यात आला, यात ३७ हून अधिक नागरिकांचा मृत्यू झाला असून २०० हून अधिक जण जखमी झाले आहेत. मृतांमध्ये जॉइंट अवामी ॲक्शन कमिटीचे सदस्य उमर नजीर यांचे बंधू उस्मान नजीर यांचाही समावेश आहे. आंदोलनाच्या पार्श्वभूमीवर स्थानिक स्वराज संस्थांच्या निवडणुकांवर देखील याचा परिणाम होताना दिसत आहे. या निवडणुकांवर हिंसाचार, निवडणुकीत फेरफार केल्याचे आरोप आणि नागरिकांना बेपत्ता होण्याच्या घटनांचे सावट आहे.