अभिनेता आर. माधवन राजकारणात येणार? म्हणाला, “मी मुख्यमंत्री विजयला खूप चांगल्या प्रकारे ओळखतो…”, उदयनिधींवरही भाष्य

“बदल घडू शकतो हा विश्वास मिळाला”

आपल्या आगामी ‘GDN’ या चित्रपटाच्या प्रसिद्धीनिमित्त प्रसिद्ध दिग्दर्शक के. एस. रविकुमार यांनी माधवनची मुलाखत घेतली. या मुलाखतीत सिनेमापासून राजकीय घडामोडींपर्यंत अनेक मुद्द्यांवर चर्चा झाली.

तमिळनाडूच्या बदलत्या राजकारणावर बोलताना माधवन काय म्हणाला?

“तमिळनाडूत सध्या अनेक चांगल्या गोष्टी घडत आहेत. राजकीय पटलावर इतक्या वेगाने झालेला बदल पाहून, नक्कीच चांगला बदल घडू शकतो असा विश्वास सर्वांना मिळाला आहे. मी विजयला खूप चांगल्या प्रकारे ओळखतो. ‘माझा मित्र विजय आता मुख्यमंत्री झाला आहे’, हे मी अत्यंत अभिमानाने सांगू शकतो.”

याच चर्चेदरम्यान दिग्दर्शक रविकुमार यांनी द्रमुक पक्षाचे नेते आणि माजी उपमुख्यमंत्री उदयनिधी स्टालिन तसेच त्यांच्या कुटुंबाचा उल्लेख केला. त्यावर बोलताना माधवनने, आरोग्यदायी राजकारण आणि लोककल्याणाला प्राधान्य दिले पाहिजे असे मत व्यक्त केले.

स्वतःच्या राजकारण प्रवेशावर काय म्हणाला माधवन?

चित्रपटसृष्टीतील अभिनेते राजकारणात यशस्वी होत असताना, “तुम्हीसुद्धा राजकारणात प्रवेश करणार का?” असा प्रश्न विचारल्यावर माधवनने त्वरित नकार दिला.

“राजकारणात जाण्यात मला अजिबात रस नाही”

• दुधारी तलवार: “राजकारण ही दुधारी तलवार आहे. तुम्ही चांगले काम केले तरी लोक टीका करतात आणि चुका झाल्या तरी. तुम्ही काहीही केले तरी त्याला नकारात्मक दृष्टीने पाहणारा एक वर्ग असतोच.”
• सत्तेची हाव नाही: “माझा राजकारणात येण्याचा ‘अजिबात विचार नाही’. राजकारणात येण्यासाठी जनसेवेची तीव्र भावना असावी लागते. लोकांचे नेतृत्व करावे किंवा मुख्यमंत्री व्हावे, अशी कोणतीही सत्तेची इच्छा माझ्या मनात नाही.”
• स्वतःच्या मार्गाने समाजसेवा: “मी मला शक्य असलेल्या मार्गाने समाजाचे भले करत राहीन. मला सुरुवातीपासूनच राजकारणाची फारशी तांत्रिक समज नाही, पण लोकशाही मार्गाने निवडून आलेल्या व्यक्तीचा आदर करणे मी माझे कर्तव्य मानतो.”

७ ऑगस्ट रोजी प्रदर्शित होतोय ‘GDN’

आर. माधवनचा आगामी तमिळ चित्रपट ‘GDN’ ७ ऑगस्ट रोजी चित्रपटगृहात प्रदर्शित होण्यासाठी सज्ज आहे. हा चित्रपट भारताचे महान शोधक आणि उद्योगपती गोपालस्वामी दोराईस्वामी नायडू यांच्या जीवनपटावर आधारित आहे.