नीट पेपरफुटी प्रकरणावरून देशभरातील विद्यार्थ्यांमध्ये मोठा असंतोष पाहायला मिळाला होता. यानंतर संपूर्ण देशभरात अनेक मोठी आंदोलने झाली होती. आता आंदोलनानंतर युवा पिढीशी, विशेषतः ‘जेन-झेड’शी (Gen Z) थेट नातं जोडण्यासाठी सर्वच प्रमुख राजकीय पक्ष डिजिटल माध्यमांचा आक्रमक वापर करत आहेत.
एकीकडे पंतप्रधान नरेंद्र मोदी इन्स्टाग्राम रील्सच्या माध्यमातून तरुणांपर्यंत पोहोचण्याचा प्रयत्न करत आहेत, तर दुसरीकडे राहुल गांधी इन्स्टाग्रामवरील लोकप्रिय ट्रेंड्सचा वापर करून विद्यार्थ्यांच्या प्रश्नांना थेट उत्तरे देत संवाद साधत आहेत.
लोकसभेतील विरोधी पक्षनेते राहुल गांधी यांनी सोशल मीडियावर तरुण पिढीशी संवाद साधताना एक रंजक खुलासा केला आहे. इन्स्टाग्रामवर आयोजित एका विशेष ‘आस्क मी एनीथिंग’ सत्रादरम्यान, जेव्हा एका विद्यार्थ्याने राहुल गांधींना “भारतीय जनता पक्षातील तुमचा सर्वात आवडता नेता कोणता?” असा प्रश्न विचारला, तेव्हा राहुल गांधींनी दिलेले उत्तर सध्या सोशल मीडियावर चांगलेच चर्चेत आले आहे.
राहुल गांधी यांनी या प्रश्नाचे उत्तर देताना पंजाबचे माजी मुख्यमंत्री कॅप्टन अमरिंदर सिंग यांचे नाव घेतले. “नक्कीच, कॅप्टन अमरिंदर सिंग! माझे त्यांच्याशी खूप चांगले संबंध आहेत. ते अत्यंत अभ्यासू आणि दिलखुलास व्यक्तिमत्त्व आहेत,” असे राहुल गांधी म्हणाले.
लष्करी इतिहासाचे गाढे अभ्यासक
कॅप्टन अमरिंदर सिंग यांच्याबद्दल बोलताना राहुल गांधींनी त्यांच्या अभ्यासू वृत्तीचे आणि लष्करी ज्ञानाचे विशेष कौतुक केले. “कॅप्टन हे लष्करी इतिहासाचे गाढे अभ्यासक आणि तज्ज्ञ आहेत. त्यांनी या विषयावर अनेक उत्कृष्ट पुस्तकेही लिहिली आहेत. त्यामुळे मला ते खूप आवडतात,” असे राहुल गांधी म्हणाले.
आपल्या आणि कॅप्टन यांच्यातील कौटुंबिक व जुन्या संबंधांची आठवण करून देत राहुल गांधींनी हलक्या-फुलक्या अंदाजात “हॅलो, अंकल अमरिंदर!” असे म्हणत या संवादात अधिकच रंग भरला.
कोण आहेत कॅप्टन अमरिंदर सिंग?
- माजी लष्करी अधिकारी: १९६५ च्या भारत-पाकिस्तान युद्धादरम्यान त्यांनी भारतीय सैन्यात आपली सेवा बजावली आहे.
- पंजाबचे माजी मुख्यमंत्री: काँग्रेसमध्ये असताना त्यांनी दोनदा पंजाबचे मुख्यमंत्रीपद भूषवले आहे.
- भाजपमध्ये प्रवेश: २०२१ मध्ये काँग्रेसच्या राज्य नेतृत्वाशी मतभेद झाल्यानंतर त्यांनी काँग्रेसला रामराम ठोकला. त्यानंतर त्यांनी ‘पंजाब लोक काँग्रेस’ हा स्वतःचा पक्ष स्थापन केला आणि २०२२ मध्ये या पक्षाचे भाजपमध्ये विलीनीकरण केले.
राजकीय विश्लेषकांच्या मते, राहुल गांधींनी कॅप्टन अमरिंदर सिंग यांच्याबद्दल दाखवलेली ही आपुलकी आगामी पंजाब विधानसभा निवडणुकांच्या पार्श्वभूमीवर राजकीयदृष्ट्याही महत्त्वपूर्ण मानली जात आहे.
