‘नॅशनल हेराल्ड’ प्रकरणात गांधी कुटुंबीयांना दिलासा

‘ईडी’ची तक्रार वैध ‘एफआयआर’वर नसून भाजप नेते डॉ. सुब्रमण्यम स्वामी यांनी दाखल केलेल्या खासगी तक्रारीवर आधारित आहे. त्यामुळे ती कायदेशीरदृष्ट्या ग्राह्य धरता येत नाही, असे विशेष न्यायाधीश विशाल गोगणे यांनी स्पष्ट केले. तक्रारीनंतर एफआयआर नोंदवला नसेल तर फौजदारी प्रक्रिया संहितेच्या (सीआरपीसी) अनुच्छेद २०० अंतर्गत दाखल झालेल्या खासगी तक्रारीच्या आधारे आर्थिक हेराफेरीविरोधी कायद्यानुसार (पीएमएलए) तपास करता येत नाही, असेही न्यायालयाने स्पष्ट केले. तपासाची सुरुवात ‘एफआयआर’च्या आधारे करायची असते.

सुब्रमण्यम स्वामी यांनी तक्रार करूनही ‘सीबीआय’ने ‘एफआयआर’ नोंदवण्यास नकार दिला. मात्र, संबंधित अनुसूचित गुन्ह्याबाबत ‘एफआयआर’ नसतानाही ‘ईडी’ने याप्रकरणी माहिती अहवाल दाखल केला, अशी टिप्पणीही न्यायालयाने केली. त्या आधारे याप्रकरणी ‘ईडी’ने या प्रकरणात ९ एप्रिल रोजी आरोपपत्र दाखल केले होते.एफआयआर न नोंदवता खटला चालवता येणार नसला तरी ही आरोपींची निर्दोष मुक्तता नाही. मात्र, सध्याची ‘ईडी’ची कारवाई थांबवली जाणार आहे. ‘ईडी’ला या आदेशाविरोधात कायदेशीर पर्याय वापरण्याची मुभा असेल. याप्रकरणी दिल्ली पोलिसांच्या आर्थिक गुन्हा शाखेने सोनिया गांधी व राहुल गांधी यांच्याविरोधात ऑक्टोबरमध्ये ‘एफआयआर’ नोंदवला आहे.

न्यायालयाच्या आदेशाचे काँग्रेसने स्वागत केले असून राजकीय सूडबुद्धीने दाखल केलेल्या प्रकरणाला मिळालेली ही कायदेशीर चपराक असल्याचे म्हटले आहे. दरम्यान, या प्रकरणात दिल्ली पोलिसांनी नव्याने दाखल केलेल्या एफआयआरची दखल घेतल्यानंतर अंमलबजावणी संचालनालय (ईडी) सोनिया आणि राहुल गांधी यांच्यासह इतरांविरुद्ध नवीन आरोपपत्र दाखल करणार आहे.

सुब्रमण्यम स्वामी यांची तक्रार

भाजपचे नेते डॉ. सुब्रमण्यम स्वामी यांनी २०१२ मध्ये ‘असोसिएटेड जर्नल्स लिमिटेड’ (एजेएल) या ‘नॅशनल हेराल्ड’ वृत्तपत्राच्या प्रकाशक संस्थेच्या मालमत्ता हस्तांतरणात आर्थिक गैरव्यवहार झाल्याची तक्रार दाखल केली होती. त्यानंतर सीबीआय व नंतर ईडी यांनी चौकशी केल्यानंतर सोनिया गांधी, राहुल गांधी यांच्यासह सुमन दुबे, सॅम पित्रोदा आदी काँग्रेस नेत्यांना आरोपी केले. ‘यंग इंडिया’ आणि ‘डोटेक्स मर्चेंडाइज’ या दोन कंपन्यांचाही आरोपपत्रात समावेश आहे. ‘एजेएल’ने ९९ टक्के शेअर्स अवघ्या ५० लाख रुपयांत ‘यंग इंडिया’ला हस्तांतरित केले. त्यामुळे सोनिया व राहुल गांधींना मोठा नफा झाल्याचा आरोप ठेवण्यात आला आहे.