Pahalgam Terror Attack Updates : “दहशतवादाविरोधात आम्ही भारताबरोबर!”, पहलगाम हल्ल्यावरून रशिया, इस्रायल, इटली, युकेसहीत जगभरातून प्रतिक्रिया!

जम्मू आणि काश्मीरमधील पहलगाम या रिसॉर्ट शहरापासून सुमारे पाच किलोमीटर अंतरावर असलेल्या बैसरन कुरणात हा हल्ला झाला. या हल्लाबाबत अमेरिकेचे राष्ट्राध्यक्ष डोनाल्ड ट्रम्प म्हणाले, पंतप्रधान नरेंद्र मोदी आणि भारताच्या जनतेला अमेरिकेचा पूर्ण पाठिंबा आहे आणि त्यांना खोलवर सहानुभूती आहे.” या हल्ल्यानंतर डोनाल्ड ट्रम्प यांनी मोदींशी फोनवरून संपर्क साधला होता.

“काश्मीरमधून खूप त्रासदायक बातमी समोर आली आहे. दहशतवादाविरुद्ध अमेरिका भारतासोबत खंबीरपणे उभी आहे. आम्ही मृतांच्या आत्म्यासाठी आणि जखमींना बरं वाटावं याकरता प्रार्थना करतो. पंतप्रधान मोदी आणि भारतातील लोकांना आमचा पूर्ण पाठिंबा आणि खोल सहानुभूती आहे”, असं ट्रम्प यांनी त्यांच्या सोशल मीडिया प्लॅटफॉर्म ट्रुथ सोशलवर म्हटले आहे. दरम्यान, अमेरिकेचे उपराष्ट्राध्यक्ष जेडी व्हॅन्स दोन दिवसांच्या भारताच्या दौऱ्यावर होते. या दौऱ्यादरम्यानच हा हल्ला झाला आहे. त्यांनीही या प्रकरणी शोक व्यक्त केला.

“उषा आणि मी भारतातील पहलगाम येथे झालेल्या विनाशकारी दहशतवादी हल्ल्यातील बळींबद्दल शोक व्यक्त करतो. गेल्या काही दिवसांपासून या देशाच्या आणि लोकांच्या सौंदर्याने आम्ही भारावून गेलो आहोत. या भयानक हल्ल्याबद्दल शोक व्यक्त करताना आमचे विचार आणि प्रार्थना त्यांच्यासोबत आहेत”, असे व्हॅन्स यांनी X वरील पोस्टमध्ये म्हटले आहे.

Usha and I extend our condolences to the victims of the devastating terrorist attack in Pahalgam, India. Over the past few days, we have been overcome with the beauty of this country and its people. Our thoughts and prayers are with them as they mourn this horrific attack. https://t.co/cUAyMXje5A

— JD Vance (@JDVance) April 22, 2025

रशिया, UAE, UK, इस्रायलच्या नेत्यांकडूनही निषेध

रशिया, युएई, यूके, फ्रान्स, इस्रायल, इराण आणि इतर अनेक जागतिक नेत्यांनीही या दहशतवादी हल्ल्याचा तीव्र निषेध केला. रशियन दूतावासाच्या म्हणण्यानुसार, राष्ट्रपती पुतिन यांनी सर्व प्रकारच्या दहशतवादाशी लढण्यासाठी भारतासोबत वचनबद्ध असल्याचं म्हटलं.

“पहलगाम शहराजवळ झालेल्या दहशतवादी हल्ल्यात विविध देशांचे नागरीक मृत्यूमुखी पडले आहेत. त्यांच्याप्रती शोक व्यक्त करतो. या क्रूर गुन्ह्याचे कोणतेही समर्थन असू शकत नाही. आम्हाला अपेक्षा आहे की या हल्ल्यातील गुन्हेगारांना शिक्षा होईल. दहशतवादाच्या सर्व प्रकारांविरुद्धच्या लढाईत आम्ही भारताबरोबर आहोत”, असे रशियाचे अध्यक्ष पुतिन यांनी म्हटल्याचं रशियाच्या परराष्ट्र मंत्रालयाकडून सांगण्यात आलं आहे.

Deepest condolences to the people and the Government of India over the heinous terror attack against tourists in Pahalgam. Russia resolutely stands with India.

— Denis Alipov ?? (@AmbRus_India) April 22, 2025

तर, युनायटेड किंग्डमचे पंतप्रधान केयर स्टारमर यांनी एक्स वर पोस्ट केले की, “आज काश्मीरमध्ये झालेला भयानक दहशतवादी हल्ला अत्यंत विनाशकारी आहे. माझ्या संवेदना प्रभावित झालेल्यांसोबत, त्यांच्या प्रियजनांसोबत आणि भारतातील लोकांसोबत आहेत.”

The horrific terrorist attack in Kashmir today is utterly devastating.

My thoughts are with those affected, their loved ones, and the people of India.

— Keir Starmer (@Keir_Starmer) April 22, 2025

संयुक्त अरब अमिरातीने (UAE) अशा गुन्हेगारी कृत्यांचा तीव्र निषेध व्यक्त केला आणि आंतरराष्ट्रीय कायद्याचे उल्लंघन करून सुरक्षा आणि स्थिरता कमी करण्याच्या उद्देशाने सर्व प्रकारच्या हिंसाचार आणि दहशतवादाचा प्रतिकार केला.

इटलीच्या पंतप्रधान जॉर्जिया मेलोनी यांनी X वरील एका पोस्टमध्ये म्हटले आहे की, दहशतवादी हल्ल्यामुळे त्यांना खूप दुःख झाले आहे आणि त्यांनी भारत सरकार आणि जनतेसोबत एकता व्यक्त केली आहे.

Profondamente addolorata per l’attacco terroristico avvenuto oggi in India, che ha causato numerose vittime. L’Italia esprime vicinanza alle famiglie colpite, ai feriti, al Governo e a tutto il popolo indiano.

— Giorgia Meloni (@GiorgiaMeloni) April 22, 2025

इराणी दूतावासाने X वरील एका पोस्टमध्ये म्हटले आहे की, “नवी दिल्लीतील इस्लामिक रिपब्लिक ऑफ इराण दूतावासाकडून जम्मू आणि काश्मीरमधील पहलगाम शहरात झालेल्या दहशतवादी हल्ल्याचा तीव्र निषेध करतो, ज्यामध्ये मोठ्या संख्येने निष्पाप लोक मृत्युमुखी पडले आणि जखमी झाले. आम्ही भारत सरकार आणि जनतेप्रती, विशेषतः या हल्ल्यातील बळींच्या कुटुंबियांबद्दल, मनापासून संवेदना व्यक्त करतो आणि जखमींना लवकर बरे होण्यासाठी आणि चांगल्या आरोग्यासाठी शुभेच्छा देतो.”

भारतातील फ्रान्सचे राजदूत थिएरी माथू म्हणाले की, दहशतवादाविरुद्धच्या लढाईत त्यांचा देश भारतासोबत एकजुटीने उभा आहे. जम्मू आणि काश्मीरमधील भ्याड हल्ल्याचा तीव्र निषेध. माझ्या संवेदना पीडितांसोबत आणि त्यांच्या कुटुंबियांसोबत आहेत. दहशतवादाविरुद्धच्या लढाईत फ्रान्स भारतासोबत एकजुटीने उभा आहे. #पहलगाम,” असे त्यांनी X वरील पोस्टमध्ये म्हटले आहे.

Message from the French President @EmmanuelMacron following the terror attack in #Pahalgam: pic.twitter.com/qdwPhlx0Yr

— French Embassy in India ???? (@FranceinIndia) April 23, 2025

इस्रायलचे भारतातील राजदूत रुवेन अझर यांनी दहशतवादाविरुद्धच्या लढाईत भारताला आपल्या देशाचा पाठिंबा जाहीर केला.