‘रशियाच्या हल्ल्यात एक भारतीय ठार’, पंतप्रधान मोदी-पुतिन यांची भेट होताच युक्रेनचे राष्ट्राध्यक्ष झेलेन्स्कींचा मोठा दावा

जवळपास चार वर्षांपासून रशिया आणि युक्रेनमध्ये संघर्ष सुरू आहे. दोन्ही देश सातत्याने एकमेकांच्या शहरांवर हवाई हल्ले करत आहेत. या युद्धाचा फटका जगातील अनेक देशांनाही बसत आहे. पंतप्रधान मोदी यांनी सोमवारी रशिया-युक्रेन संघर्षाच्या पार्श्वभूमीवर रशियाचे अध्यक्ष व्लादिमीर पुतिन यांना युक्रेनशी सुरू असलेले युद्ध थांबविण्याचे आवाहन केले होते.

किर्गिझस्तानची राजधानी बिश्केक येथे सुरू असलेल्या शांघाय सहकार्य संघटनेच्या शिखर परिषदेदरम्यान पंतप्रधान मोदी आणि पुतिन यांची सोमवारी भेट झाली होती.

झेलेन्स्की काय म्हणाले?

रशियन सैन्याने कीव आणि आसपासच्या परिसरात रात्रभर क्षेपणास्त्र आणि ड्रोनच्या माध्यमातून हवाई हल्ले केले. यामुळे राजधानीत सलग सहाव्या दिवशी ठिकठिकाणी स्फोटाचे आवाज येत होते. युक्रेनियन यंत्रणेने दिलेल्या माहितीनुसार, अनेक निवासी वसाहती आणि नागरी पायाभूत सोयी-सुविधांना लक्ष्य करण्यात आले असून त्याचे नुकसान झाले आहे, अशी माहिती झेलेन्स्की यांनी दिली.

झेलेन्स्की पुढे म्हणाले की, या हल्ल्यात मोठ्या संख्येने जेट इंजिनवर चालणारी बॅलिस्टिक क्षेपणास्त्रे आणि ड्रोन्स वापरण्यात आली. दुर्दैवाने निवासी इमारती आणि नागरी सोयी-सुविधांना लक्ष्य करण्यात आले असून त्याचे नुकसान झाले आहे.

१२ जणांचा मृत्यू, १ भारतीयाचा समावेश

“रशियाच्या हल्ल्यात १२ जणांचा मृत्यू झाला असून त्यापैकी एक भारतीय नागरिक आहे. डझनभर लोक जखमी झाले आहेत. ज्यांनी आपल्या कुटुंबातील व्यक्ती गमावली, त्यांच्याप्रती मी संवेदना व्यक्त करतो”, असेही युक्रेनचे राष्ट्राध्यक्ष यावेळी म्हणाले.

रशियाच्या ताज्या हल्ल्यानंतर युक्रेनमधील शहरात हवाई रेड अलर्ट जारी करण्यात आला आहे. कीवमध्ये आपत्कालीन यंत्रणांनी अनेक ठिकाणी आग लागल्याच्या घटनांची माहिती दिली. तसेच हल्ल्यांमुळे अनेक इमारतींचे नुकसान झाल्याचेही सांगण्यात येत आहे. झेलेन्स्की यांनी आरोप केला की, रशियाने मुद्दामहून हल्ल्याची तीव्रता वाढवली असून अधिकाधिक मनुष्यहानी करण्याचा त्यांचा प्रयत्न दिसतो. युक्रेनची हवाई सुरक्षा यंत्रणा कमकुवत ठरल्यामुळे असे हल्ले यशस्वी होत आहेत.

न संपणारे युद्ध थांबवावे – पंतप्रधान मोदी

रशिया आणि युक्रेन यांच्यातील न संपणारे युद्ध थांबवावे, असे आवाहन पंतप्रधान मोदी यांनी सोमवारी रशियाचे राष्ट्राध्यक्ष पुतिन यांना केले होते. “युद्धाचा प्रत्येक दिवस मानवतेला पिछाडीवर ढकलतो. गांधीजी व बुद्धाचा देश असलेल्या भारताचा शांततेसाठी सर्व त्या प्रयत्नांना पाठिंबा आहे आणि यापुढेही राहील”, असेही पंतप्रधान मोदी यावेळी म्हणाले.