scorecardresearch

युक्रेन : पहिल्या युद्धगुन्हेगार रशियन सैनिकास जन्मठेप

वादिम शिशिमरिन या २१ वर्षीय रशियाच्या रणगाडा कमांडरला ६२ वर्षीय ओलेक्सांद्र शेलिपोव्ह यांच्या मृत्यूप्रकरणी दोषी ठरवण्यात आले

कीव्ह : रशियाच्या एका सैनिकास युक्रेनच्या शस्त्रहीन नागरिकाला ठार केल्याप्रकरणी युक्रेनच्या न्यायालयाने जन्मठेपेची शिक्षा ठोठावली. रशियाने २४ फेब्रुवारीपासून युक्रेनवर केलेल्या आक्रमणानंतर सुरू झालेल्या युद्धातील शिक्षा झालेला तो पहिला युद्धगुन्हेगार ठरला आहे. रशियाकडून अद्याप यावर प्रतिक्रिया आलेली नाही.

वादिम शिशिमरिन या २१ वर्षीय रशियाच्या रणगाडा कमांडरला ६२ वर्षीय ओलेक्सांद्र शेलिपोव्ह यांच्या मृत्यूप्रकरणी दोषी ठरवण्यात आले. ईशान्य युक्रेनमधील चुपाखिव्का गावात २८ फेब्रुवारीला या युक्रेनच्या ज्येष्ठ नागरिकावर गोळीबाराचे आदेश वादिमने दिले असल्याचा त्याच्यावर आरोप होता.

न्यायाधीश सेर्हिय आगाफोनोव्ह यांनी सांगितले, की वादिम शिशिमरिन याने आपल्या वरिष्ठांचे आदेश पाळत या नागरिकाच्या डोक्यात स्वयंचलित शस्त्राने बेधुंद गोळीबार केला. ही शिक्षा सुनावली जात असताना शिशिमरिन  निर्विकारपणे बसून होता. या खटल्याला युक्रेनमध्ये फार प्रतिकात्मक महत्त्व आहे. रशियाच्या आक्रमणानंतर रशियन युद्ध गुन्हेगारावर हा पहिला खटला पूर्ण झाला आहे. सुमारे दहा हजारांवर युद्धगुन्हे रशियाने केल्याचेही युक्रेनने नमूद केले आहे. 

मराठीतील सर्व देश-विदेश ( Desh-videsh ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Russian soldier sentenced to life in prison for ukraine war crime zws

ताज्या बातम्या