“मला घरभाडं भरावं लागतं, भाजपा कार्यकर्त्यांना पगार देत नाही”, राजीनाम्या दिल्यानंतर शहजाद पूनावालांची स्पष्टोक्ती

राजकीय पक्ष कार्यकर्त्यांना पैसे देत नाहीत

“मला माझं घर भाडं भरायचं आहे. मी भाजपाचा आहे म्हणून माझा घरमालक मला मोफत घर देणार नाही. तो १ तारखेला माझ्याकडे भाडं मागतो. राजकीय पक्ष कार्यकर्त्यांना पैसे देत नाहीत”, असं शहझाद पूनावाला म्हणाले. परंतु त्यांनी लगेचच स्पष्ट केलं की, भाजपाने त्यांचा सांभाळ करावा अशी त्यांची अपेक्षा नव्हती आणि ते अजूनही पक्षाच्या आणि पंतप्रधानांच्या दृष्टीकोनाशी कटिबद्ध आहेत. “भाजपाचे काम माझा किंवा इतर कोणत्याही कार्यकर्त्याचा सांभाळ करणे नाही. बघा, जेव्हा तुम्ही एखाद्या राजकीय चळवळीत सामील होता, तेव्हा ती नोकरी नसते. तुम्ही विचारधारा, व्यक्ती किंवा संघटना यांच्यावरील प्रेमामुळे कार्यकर्ते बनता. या तिन्ही गोष्टी अजूनही माझ्यात कायम आहेत.”

मी लेताही नाही आणि बेटाही नाही

काँग्रेस सोडल्यानंतर २०२१ मध्ये भाजपामध्ये प्रवेश केलेल्या शहझाद पूनावाला यांनी भाजपामधून अचानक बाहेर पडण्याचं मुख्य कारण आर्थिक समस्या असल्याचं सांगितलं. त्यांनी नमूद केलं की, बहुतेक राजकारणी एकतर ‘लेता’ (काही फायदे घेणारे) किंवा ‘बेटा’ (कोणाचे तरी मुलगे) या श्रेणीत येतात, परंतु ते या दोन्ही श्रेणीत मोडत नाहीत आणि म्हणूनच त्यांना उदरनिर्वाहाचे मार्ग शोधण्याची गरज आहे. “तुम्हाला असं का वाटतं की सर्व राजकारणी ‘लेता’ किंवा ‘बेटा’ असतात? मी ‘लेता’ देखील करत नाही, म्हणजेच काही घेत नाही आणि मी कोणत्याही मोठ्या राजकारण्याचा ‘बेटा’ देखील नाही.”

ते पुढे म्हणाले, “माझ्यासारखी पहिली पिढी असलेले, नवयुगातील राजकारणी कोणत्याही वारशातून येत नाहीत, हे स्वीकारायला लोक तयार नाहीत. काय होतं की आपल्याला सचिन पायलट किंवा हे सर्व नेते आणि ‘बेटा’ पाहण्याची इतकी सवय झाली आहे की, प्रत्येकाची जीवनशैली तशीच असेल असं आपण गृहीत धरतो.” पूनावाला यांनी सांगितलं की त्यांचा राजीनामा हा अचानक घेतलेला निर्णय नव्हता, तर ते २०२४ पासून याबद्दल विचार करत होते. काही आठवड्यांपूर्वी त्यांनी पहिल्यांदा पक्ष सोडण्याची इच्छा व्यक्त केल्यानंतर पक्षाच्या नेतृत्वाने त्यांच्याशी संपर्क साधल्याचंही त्यांनी सांगितलं.

“ज्यांना माझ्याशी संपर्क साधायचा होता त्यांनी ३० जुलै रोजीच माझ्याशी संपर्क साधला होता. आणि त्याआधीही, जेव्हा मी मला येणाऱ्या अडचणींबद्दल सांगितलं, तेव्हा त्यांनी माझ्यासाठी मार्ग काढण्याचा किंवा माझी काळजी कशी घेता येईल हे पाहण्याचा प्रयत्न केला. पण प्रामाणिकपणे सांगायचं तर, माझा विवेक मला याची परवानगी देत नाही. भाजपा माझ्यासाठी रोजगाराची संधी नाही, तर ती माझी वैचारिक संधी आहे. आणि भाजपाच्या विचारधारेवर किंवा मोदीजींच्या दृष्टीकोनावर विश्वास ठेवण्यासाठी मला भाजपामध्ये कोणत्याही पदावर असण्याची गरज नाही.”