प्रेयसीसाठी पार केली भारत-पाक सीमा! २ मिनिटांची भेट अन्… उरी न्यायालयाच्या आदेशानंतर प्रियकर पाकिस्तानात परत

Snapchat वर प्रेम आणि थेट उरीमध्ये एन्ट्री!

झिशान अहमद मीर असं या २२ वर्षीय तरुणाचं नाव असून तो ‘पाकिस्तानव्याप्त काश्मीर’ मधील ‘पनकेडी’ गावचा रहिवासी आहे. झिशानचं उरीमध्ये राहणाऱ्या इरम मजीद नावाच्या मुलीवर जीवापाड प्रेम जडलं होतं. या दोघांची ओळख ‘स्नॅपचॅट’ (Snapchat) या सोशल मीडिया ॲपवर झाली होती. प्रेम इतकं रंगलं की, इरमला डोळे भरून पाहण्यासाठी झिशानने ३१ मे रोजी थेट उरी सेक्टरमधून ‘लाईन ऑफ कंट्रोल’ पार केली आणि तो भारतात दाखल झाला.

लष्कराकडून अटक, पण हेतू शुद्ध होता!

झिशानने सीमा पार करताच भारतीय लष्कराने त्याला ‘सिलिकोट’ या प्रतिबंधित आणि कुंपण घातलेल्या सीमावर्ती गावातून ताब्यात घेतले. सुरुवातीला तो कोणी संशयित घुसखोर असावा, असा संशय होता. मात्र, लष्कराने आणि गुप्तहेर यंत्रणांनी जेव्हा त्याची कसून चौकशी केली, तेव्हा एक धक्कादायक पण भावनिक सत्य समोर आलं. झिशानचा कोणताही चुकीचा किंवा देशविरोधी हेतू नव्हता, तो केवळ त्याच्या प्रेयसीला भेटायला आला होता.

कायदेशीर कारवाई आणि सुटका

लष्कराने खात्री पटल्यानंतर झिशानला पुढील कायदेशीर कारवाईसाठी पोलिसांच्या हवाली केले. बेकायदेशीर घुसखोरी केल्याप्रकरणी पोलिसांनी त्याच्याविरुद्ध गुन्हा नोंदवून त्याला बारामुल्ला येथील तुरुंगात पाठवले. तीन दिवसांपूर्वी पोलिसांनी न्यायालयात आरोपपत्र दाखल केले. उरी न्यायालयाने संपूर्ण प्रकरणाची पार्श्वभूमी आणि झिशानचा निष्पाप हेतू लक्षात घेऊन हे प्रकरण निकाली काढले आणि त्याच्या मायदेशी रवानगीचे आदेश दिले.

शेवटची भेट आणि डोळ्यातले अश्रू…

शनिवारी दुपारी साडेबारा वाजता ‘कमन पोस्ट’ येथे भारतीय अधिकाऱ्यांनी झिशानला पाकिस्तानी सैनिकांच्या स्वाधीन केले. पण, त्याला परत पाठवण्यापूर्वी भारतीय प्रशासनाने एक संवेदनशील पाऊल उचलले. झिशानला त्याची प्रेयसी इरम आणि तिच्या कुटुंबाला भेटण्याची परवानगी देण्यात आली.

“आम्हाला त्याला जाण्यापूर्वी फक्त दोन ते तीन मिनिटे भेटू दिले. तो काहीच बोलू शकला नाही, आम्ही तिथे असेपर्यंत तो फक्त ढसाढसा रडत होता,” अशी भावनिक प्रतिक्रिया इरमने दिली. दोघांची ही भेट अत्यंत भावुक होती. प्रेम पूर्ण होऊ शकले नाही तरी, भारताने दाखवलेल्या कायदेशीर आणि मानवतावादी दृष्टिकोनामुळे झिशान सुखरूप आपल्या घरी परतला आहे.