नेहरूंची निंदानालस्ती हेच मुख्य उद्दिष्ट, सोनिया गांधी यांची भाजपवर टीका

दिल्लीमधील जवाहर भवन येथे नेहरू केंद्राचे शुक्रवारी उद्घाटन करण्यात आले. या सोहळ्यात बोलताना सोनिया गांधी म्हणाल्या, “जवाहरलाल नेहरू यांना बदनाम करणे, विकृतीकरण करणे, कमी लेखणे आणि चारित्र्यहनन करणे यासाठी पद्धतशीर प्रयत्न केले जात आहेत आणि हे अजिबात खपवून घेतले जाणार नाही.”

“नेहरूंच्या बदनामी मोहिमेमागे त्यांची प्रतिमाहनन करणे हे एकमेव उद्दिष्ट नाही तर संपूर्ण जगाने मान्य केलेले, देशाच्या स्वातंत्र्य चळवळीतील त्यांचे कार्य नाकारणे हाही हेतू आहे. स्वतःच्या सोयीने इतिहासाचे पुनर्लेखन करण्यासाठी नेहरूंच्या वारसा नष्ट करण्याचा प्रयत्न केला जात आहे,” अशी टीका सोनिया गांधी यांनी केली.

सत्ताधारी पक्ष जो सामाजिक, राजकीय आणि आर्थिक पाया नष्ट करण्याचा प्रयत्न करत आहे, त्यावरच आपल्या देशाची बांधणी आणि उभारणी झाली आहे, असे सोनिया म्हणाल्या. नेहरू हे आधुनिक भारताचे शिल्पकार होते, त्यांचा आर्थिक वाढीच्या नियोजनावर अढळ विश्वास होता आणि ते वैज्ञानिक व तंत्रज्ञान क्षमता विकसित करण्याबरोबरच विज्ञाननिष्ठ विचारांसाठी कटिबद्ध होते, अशा शब्दांमध्ये सोनिया गांधी यांनी नेहरूंचे स्मरण केले. नेहरूंचा धर्मनिरपेक्षतेवर ठाम विश्वास होता. देशाचे ऐक्य मजबूत करतानाच भारताची विविधता जपणे आणि त्याविषयी ममत्व बाळगणे हीच त्यांच्यासाठी धर्मनिरपेक्षता होती. त्यांच्या वारशामुळे आजही आपले जीवन घडत आहे, अशी कृतज्ञता सोनिया गांधींनी व्यक्त केली.

नेहरूवादाच्या वारशाचे बचावात्मक पवित्रा न बाळगता जोरदार संरक्षण करणे ही केवळ स्मरणरंजनाची कृती नाही. तर ही भारताचे घटनात्मक वचन पुन्हा अंमलात आणणे, दुष्प्रचाराच्या काळात तर्काचे रक्षण आणि आपले संघराज्य आधुनिक व प्रगतशील विचारांचे असेल याची खबरदारी घेणे यासाठी कटिबद्धता आहे. – सोनिया गांधी, नेत्या, काँग्रेस</p>