नवी दिल्लीतील ‘जंतर मंतर’ या आंदोलनासाठी बंदी घातलेल्या मैदानात परवानगीशिवाय घुसून घोषणाबाजी करणाऱ्या ‘कॉक्रोच जनता पार्टी’ या संघटनेच्या तीन प्रमुख नेत्यांना दिल्ली पोलिसांनी ताब्यात घेतले होते. सौरव दास, आशुतोष रांका आणि अजिंक्य शिंदे अशी या तीन नेत्यांची नावे असून, त्यांना आज मंदिर मार्ग येथील विशेष न्यायदंडाधिकारी न्यायालयासमोर हजर करण्यात आले. त्यानंतर सौरव दास आणि आशुतोष रांका यांना पाच दिवसांची न्यायालयीन कोठडी सुनावण्यात आली आहे. ही माहिती कॉक्रोच जनता पार्टीचे संस्थापक अभिजीत दिपके यांनी सोशल मीडियावर पोस्ट करत दिली आहे.
पोलिसांनी कारवाई का केली?
मंगळवारी पहाटे या तीन नेत्यांनी दिल्ली पोलिसांचे बॅरिकेड्स तोडून जंतर मंतर परिसरात बेकायदेशीर प्रवेश करण्याचा प्रयत्न केला. जंतर मंतर हे आता आंदोलनासाठी अधिकृत स्थळ राहिलेले नसतानाही त्यांनी तेथे घोषणाबाजी केली. ‘द इंडियन एक्सप्रेस’ने यासंदर्भातील वृत्त दिले आहे.
याप्रकरणी पोलिसांनी या तिघांविरुद्ध खालील कलमांनुसार गुन्हा दाखल केला आहे:
- अनधिकृत प्रवेश
- प्रतिबंधात्मक आदेशाचे उल्लंघन
- शांतता कराराचा भंग
- सरकारी कामात अडथळा आणणे
कायद्यानुसार, स्थानबद्धतेच्या कारवाईत पोलिसांना कोणत्याही वॉरंटशिवाय संशयिताला ताब्यात घेता येते, जेणेकरून कायदा व सुव्यवस्थेचा प्रश्न निर्माण होणार नाही. या कारवाईनंतर कोणत्याही व्यक्तीला दंडाधिकाऱ्यांच्या मंजुरीशिवाय २४ तासांपेक्षा जास्त वेळ ताब्यात ठेवता येत नाही.
अभिजीत दिपके यांनी आपल्या ट्विटर (X) हँडलवरून या घटनेचा तीव्र निषेध केला. “जंतरमंतरवर राष्ट्रध्वज फडकवणे हा काय गुन्हा आहे का?” असा सवाल उपस्थित करत त्यांनी सरकारच्या या भूमिकेवर कडक शब्दांत ताशेरे ओढले.
अभिजीत दिपके यांचे ट्विट:
“आशु आणि सौरव यांना ५ दिवसांची न्यायालयीन कोठडी सुनावण्यात आली आहे. त्यांचा अपराध काय? तर जंतरमंतरवर तिरंगा फडकवणे! नरेंद्र मोदीजी, थोडी हिंमत दाखवा. जर विरोध आणि असंतोष दडपून टाकायचाच असेल, तर अशा भ्याड कारवायांचा आश्रय घेण्यापेक्षा अधिकृतपणे आणीबाणी जाहीर करण्याचे धाडस दाखवा.”
त्याचप्रमाणे CJP नेत्या रत्ना सिंह यांनी आरोप केला की, “या तिघांना मंगळवारी पहाटे ३ वाजता पोलिस ठाण्यात आणण्यात आले आणि त्यांना त्यांच्या वकिलांशी संपर्क साधू दिला गेला नाही. आज आशुतोष रांका यांचा वाढदिवस असूनही त्यांना सकाळपासून अशा प्रकारे डांबून ठेवण्यात आले आहे.” त्यांना न्यायालयीन कोठडी सुनावून तिहार तुरुंगात पाठवले जाण्याची शक्यताही पक्षाने व्यक्त केली आहे.
यापूर्वी १० ऑक्टोबर रोजी झालेल्या आंदोलनादरम्यानही आशुतोष रांका आणि सौरव दास यांना पोलिसांनी ताब्यात घेतले होते. त्यावेळी त्यांनी पुढील एक वर्षासाठी शांतता राखण्याचे हमीपत्र लिहून दिले होते. मात्र, या कराराचा भंग केल्याने ही कारवाई अधिक कडक मानली जात आहे.
आंदोलनाचे मुख्य कारण काय?
राजधानी दिल्लीत सध्या निवडणूक आयोगाविरोधात CJP सह इतर संघटना आक्रमक झाल्या आहेत. या पार्श्वभूमीवर दिल्लीतील कायदा व सुव्यवस्था अबाधित ठेवण्यासाठी पोलिसांनी कडक बंदोबस्त तैनात केला आहे.
