श्रीनगर : जम्मू : काश्मीरच्या कुलगाम जिल्ह्यात सुरक्षा दलांशी झालेल्या चकमकीत ठार झालेल्या जैश-ए-मोहम्मदच्या दहशतवाद्याची ओळख पटली असून, तो बाबर भाई नावाचा पाकिस्तानी दहशतवादी आहे. कुलगाम जिल्ह्याच्या परिवान भागात दहशतवादी असल्याची माहिती मिळाल्यानंतर सुरक्षा दलांनी या भागाला वेढा घालून शोधमोहीम सुरू केली असता बुधवारी ही चकमक उडाली होती. या चकमकीत १ पोलीस शहीद झाला, तसेच ३ सैनिकांसह पाच जण जखमी झाले. चकमकस्थळावरून पोलिसांनी १ एके रायफल, एक पिस्तूल व दोन हातबॉम्ब हस्तगत केले.‘पाकिस्तानातील बाबर भाई हा जैश-ए-मोहम्मदचा दहशतवादी चकमकीत मारला गेला. तो २०१८ सालापासून शोपियाँ व कुलगाम भागात सक्रिय होता. रोहित छिब नावाच्या पोलीस कर्मचाऱ्याला चकमकीत वीरमरण आले. लष्कराचे ३ सैनिक व २ नागरिक किरकोळ जखमी झाले,’ अशा माहिती काश्मीर विभागाचे पोलीस महानिरीक्षक विजय कुमार यांनी ट्विटरवर दिली.
