“पक्षात एकटा उरलो तरी…”, शत्रूघ्न सिन्हा यांचा ममता दीदींसाठी ‘एकला चलो रे’चा निर्धार; बंडखोरांना सुनावले खडे बोल

अभिषेक बॅनर्जी माझे नेते नाहीत – शत्रूघ्न सिन्हा

शत्रूघ्न सिन्हा यांनी पक्षाअंतर्गत वादावर बोलताना अभिषेक बॅनर्जी यांच्या कार्यपद्धतीमुळे अनेक जण बंड करत असून, वेगळ्या गटात सामील होत असल्याचा उल्लेख केला. “बंडखोरांबरोबर जाण्यामागे इतरही अनेक कारणं असू शकतात. कदाचित काही जण प्रलोभनाला बळी पडून जात असतील, तर काही जण भीतीपोटी जात असतील. काही जण तर केवळ मजबुरीमुळे जात आहेत. त्यामुळे माझी त्यांच्याविरोधात कोणतीही तक्रार नाही. परंतु, तृणमूल काँग्रेसमध्ये तुम्ही ज्या अभिषेक बॅनर्जी किंवा इतर नेत्यांचा उल्लेख करत आहात, त्यापैकी कोणीही माझा नेता नाही. माझ्या नेत्या केवळ आणि केवळ ममता बॅनर्जी आहेत,” असे शत्रूघ्न सिन्हा यांनी स्पष्ट केले.

तक्रार करण्याची हीच योग्य वेळ होती का? सिन्हा यांचा सवाल

“हे सर्व लोक माझे सहकारी राहिले आहेत आणि त्यातील अनेक जण माझ्यापेक्षा वयाने व अनुभवाने लहान आहेत. त्यामुळे त्यांच्या अंतर्गत बाबींवर मी कोणतीही टीका-टीप्पणी करणार नाही. मात्र, जे लोक बंडखोर गटात गेले आहेत, त्यांनी विचार करायला हवा होता की पक्षाविरुद्ध तक्रारींचा पाढा वाचण्याची हीच योग्य वेळ होती का?”, असा सवाल सिन्हा यांनी उपस्थित केला.

‘एकला चलो रे’ प्रमाणे ममतांबरोबर राहणार

“पक्षातील काही खासदार किंवा नेत्या स्वतःला ममता बॅनर्जींची ‘कॉपी कॅट’ म्हणवून घ्यायच्या, त्यांच्यासारखीच नक्कल करायच्या. त्याच व्यक्ती दीदींच्या विरोधात बोलत आहेत. अचानक असे काय घडले? त्यांनी या समस्या आधी का मांडल्या नाहीत? निवडणुकीतील पराभव तात्पुरता आहे. सध्याची वेळ एकजूट दाखवण्याची होती, तक्रारी करण्याची नव्हती,” असे शब्दात सिन्हा यांनी पक्ष सोडणाऱ्या नेत्यांना खडसावले. शत्रूघ्न यांनी यावेळी ममता बॅनर्जी यांच्याबरोबर राहणे हाच सर्वात योग्य निर्णय आहे, असल्याचे मत मांडले. “पक्षात एकटा उरलो, तरीही रवींद्रनाथ टागोरांच्या ‘एकला चलो रे’ या भूमिकेप्रमाणे मी त्यांच्याबरोबर ठाम राहीन”, असेही त्यांनी स्पष्ट केले.