Pakistan Trending Topics 2024: गुगलकडून दरवर्षी आपल्या संकेतस्थळावर सर्वाधिक शोधल्या गेलेल्या बाबींची यादी वर्षाच्या शेवटी जाहीर केली जाते. त्याचबरोबर प्रत्येक देशानुसारही ही यादी जाहीर केली जाते. नुकतीच भारतीयांनी वर्षभरात गुगलवर सर्वाधिक शोधलेल्या गोष्टींची यादी जाहीर झाली होती. त्यामध्ये आयपीएल, ऑलिम्पिक या क्रीडा प्रकारांबरोबरच भारतीय जनता पक्ष व काँग्रेस या राष्ट्रीय पक्षांबाबतच्या माहितीचाही समावेश होता. आता आपला शेजारी देश पाकिस्तानमधले युजर्स गेल्या वर्षभरात म्हणजेच २०२४ मध्ये गुगलवर कोणत्या गोष्टी सर्वाधिक शोधत होते, याची माहिती समोर आली आहे. यामध्ये अनेक रंजक बाबी समोर आल्या आहेत!
भारताशी एका बाबतीत साम्य…क्रिकेटप्रेम!
गुगलकडून Year in Search 2024 या नावाखाली ही सर्व माहिती उपलब्ध करून देण्यात आली आहे. त्यानुसार २०२४ मध्ये गुगलवर पाकिस्तानमधून सर्वाधिक शोधल्या गेलेल्या बाबींमध्ये अनेक प्रकारच्या गोष्टींचा समावेश आहे. यात भारताशी त्यांचं एका बाबतीत विलक्षण साम्य दिसून आलं. ते म्हणजे क्रिकेट! पाकिस्तानमध्येही युजर्सकडून टी २० वर्ल्डकप, पाकिस्तानी क्रिकेटपटू, विशेषत: शोएब मलिक आणि साजिद खान यांच्याबाबत युजर्सनं गुगलला अनेक प्रश्न विचारले. त्याशिवाय पाकिस्तानसाठी ऑलिम्पिकमध्ये भालाफेकीत सुवर्णपदक मिळवणारा अर्शद नदीम हादेखील पाकिस्तानमधील युजर्ससाठी उत्सुकतेचा विषय ठरला.
| क्रमांक | क्रिकेटसंदर्भातील शोध |
| १ | टी २० विश्वचषक |
| २ | पाकिस्तान सुपर लीग २०२४ वेळापत्रक |
| ३ | पाकिस्तान विरुद्ध इंग्लंड |
| ४ | पाकिस्तान विरुद्ध बांगलादेश |
| ५ | पाकिस्तान विरुद्ध ऑस्ट्रेलिया |
| ६ | पाकिस्तान विरुद्ध भारत |
| ७ | पाकिस्तान विरुद्ध अमेरिका |
| ८ | भारत विरुद्ध इंग्लंड |
| ९ | भारत विरुद्ध द. आफ्रिका |
| १० | भारत विरुद्ध इंग्लंड |
तंत्रज्ञान श्रेणीत पाकिस्तानला आयफोन प्रिय!
दरम्यान, तंत्रज्ञान श्रेणीत पाकिस्तानमधील युजर्सनं सर्वाधिक iPhone 16 Pro Max बाबतची माहिती गुगलवर शोधली. त्याशिवाय चॅटजीपीटी, जेमिनी आणि रीमेकर डॉट एआय या एआय प्लॅटफॉर्म्सबाबतही पाकिस्तानमधील युजर्सकडून माहिती शोधण्यात आली. त्यामुळे पाकिस्तानमधील नागरिकांचा एआय तंत्रज्ञानात वाढता रस यातून दिसून येत आहे.
| क्रमांक | मनोरंजनविषयक विषयांचे शोध |
| १ | हीरामंडी |
| २ | १२वी फेल |
| ३ | अॅनिमल |
| ४ | मिर्झापूर सीजन ३ |
| ५ | स्त्री २ |
| ६ | इश्क मुर्शिद |
| ७ | भूलभुलैय्या ३ |
| ८ | डंकी |
| ९ | बिग बॉस |
| १० | कभी मैं, कभी तुम |
गुगलवर पाकिस्तानचं बॉलिवूडप्रेम!
दरम्यान, मनोरंजन विश्वात पाकिस्तानकडून बॉलिवुडमधील चित्रपट आणि काही वेब सीरिजची माहिती गुगलवर सर्वाधिक शोधण्यात आली. त्यात अॅनिमल, स्त्री २ यासारख्या चित्रपटांसह हीरामंडी ही वेब सीरिज आणि बिग बॉस १७ या रिअॅलिटी शोचाही समावेश आहे.
अर्थजगतामध्ये उद्योगपती मुकेश अंबानी हे २०२४ सालात पाकिस्तानमधील युजर्ससाठी उत्सुकतेचा विषय ठरले.
