डोनाल्ड ट्रम्प यांचा अमेरिकेच्या ‘सिक्रेट मिशन’बाबत मोठा दावा; १०० मिलियन बॅरल कच्च्या तेलाचा केला उल्लेख!

‘ट्रुथ सोशल’वरील मोठी घोषणा

डोनाल्ड ट्रम्प यांनी त्यांच्या ‘ट्रुथ सोशल’ या सोशल मीडिया प्लॅटफॉर्मवर एक पोस्ट शेअर करत या मोहिमेची माहिती दिली. त्यांनी लिहिले, “गेल्या महिन्यात मी आमच्या महान अमेरिकन सैन्याला हॉर्मुझ सामुद्रधुनीतून जाणाऱ्या तेलवाहू आणि इतर व्यापारी जहाजांना सुरक्षा देण्यासाठी एका गुप्त मोहिमेचे आदेश दिले होते. मला हे सांगताना अत्यंत आनंद होत आहे की, ही मोहीम प्रचंड यशस्वी झाली आहे.”

ट्रम्प यांच्या दाव्यानुसार, या मोहिमेमुळे आतापर्यंत १० कोटी बॅरल्सपेक्षा जास्त तेल या मार्गाने सुरक्षितपणे आंतरराष्ट्रीय बाजारात पोहोचले आहे. २०० पेक्षा जास्त व्यापारी जहाजांनी या धोकादायक मार्गावरून सुरक्षित प्रवास केला आहे.

इराणवर निशाणा साधत ट्रम्प पुढे म्हणाले, “हे यश यामुळे मिळाले कारण आता हॉर्मुझ सामुद्रधुनीवर युनायटेड स्टेट्स ऑफ अमेरिकाचे नियंत्रण आहे – इराणचे नाही. त्यांचे सैन्य पराभूत झाले आहे आणि त्यांची अर्थव्यवस्था उद्ध्वस्त झाली आहे. इराणसाठी आता खेळ संपला आहे!”

इराणवर पुन्हा लष्करी हल्ले करण्याचे संकेत

दुसरीकडे, अमेरिकेसोबतच्या कराराला मंजुरी देण्यास इराणकडून होत असलेल्या उशिराबद्दल ट्रम्प यांनी तीव्र नाराजी व्यक्त केली आहे. इराणने अमेरिकेचे ‘अपॉची’ (Apache) हेलिकॉप्टर पाडल्याचा आरोप करत, ट्रम्प यांनी इराणवर पुन्हा लष्करी हल्ले करण्याचे संकेत दिले आहेत.

ओव्हल ऑफिसमध्ये पत्रकारांशी बोलताना ट्रम्प म्हणाले, “आम्ही इराणवर अत्यंत तीव्र हल्ले करणार आहोत. त्यांनी आमचे हेलिकॉप्टर पाडले, त्यामुळे आम्हाला लष्करी कारवाई करण्याचा पूर्ण अधिकार आहे.” अमेरिकेने कालच इराणवर मोठे हल्ले केले असून आज आणि पुढेही ही कारवाई सुरू राहील, असे त्यांनी स्पष्ट केले.

करार पूर्ण, फक्त स्वाक्षरी बाकी

लष्करी कारवाईचा इशारा देत असतानाच, ट्रम्प यांनी इराणसोबतचा करार पूर्ण झाल्याचेही सांगितले. “आमच्या बाजूने संपूर्ण करार तयार आहे. इराणला फक्त कागदपत्रांवर स्वाक्षरी करायची आहे. परंतु, ते जाणीवपूर्वक वेळकाढूपणा करत आहेत. आम्ही त्यांना आणखी काही दिवसांचा वेळ दिला असून पुढे काय होते ते पाहू,” असे ट्रम्प यांनी शेवटी म्हटले.