“राजकारणात अशा लाजिरवाण्या गोष्टी कराव्या लागतात”; मॅकडोनाल्ड्स स्टंटनंतर ट्रम्प यांची कबुली

नेमकी घटना काय?

सोमवारी ओव्हल ऑफिसमध्ये मॅकडोनाल्ड्सच्या चीज बर्गर्सची ऑर्डर देण्यात आली होती. अर्कांसस येथील शेरोन सिमन्स या डोअरडॅश (DoorDash) डिलिव्हरी पार्टनरने हे दोन बॅग भरलेले बर्गर आणि फ्राईज थेट राष्ट्राध्यक्षांच्या कार्यालयात पोहोचवले. ट्रम्प यांनी स्वतः हे पार्सल स्वीकारले. व्हाइट हाऊसने या कार्यक्रमाचा उद्देश ‘नो टॅक्स ऑन टिप्स’ धोरणामुळे सिमन्स यांनी वर्षाला ११,००० डॉलर्सचा कर वाचवला आहे, हे दाखवणे हा होता, असे स्पष्ट केले.

“विजय मिळवण्यासाठी हे करावे लागते”

या स्टंटवर टीका होत असताना ट्रम्प यांनी गुरुवारी रॅलीत सांगितले की, “आम्ही राजकारणात अशा गोष्टी करतो; त्या थोड्या लाजिरवाण्या असतात. त्या खरोखरच थोड्याशा विचित्र वाटतात, पण आम्ही त्या करतो आणि मग मोठ्या फरकाने निवडणुका जिंकतो.” त्यांनी पुढे हसत हसत मान्य केले की, शेरोनने ओव्हल ऑफिसमध्ये केलेली ही डिलिव्हरी काहीशी ‘टॅकी’ होती.

यावेळी त्यांनी २०२४ च्या निवडणूक प्रचारादरम्यानच्या आठवणींना उजाळा दिला. त्यांनी कचरा वेचणाऱ्या ट्रकवर चढणे आणि मॅकडोनाल्ड्समध्ये फ्राईज वाढणे यांसारख्या कल्पनांचा उल्लेख “क्रेझी आयडियाज” असा केला.

सोशल मीडियावर वादाला तोंड

या घटनेनंतर सोशल मीडियावर मोठा वाद निर्माण झाला आहे. डिलिव्हरी देणारी महिला शेरोन सिमन्स ही खरोखरच डिलिव्हरी पार्टनर आहे की तिला केवळ या ‘स्टंट’साठी उभे केले होते, असा सवाल विचारला जात आहे. सिमन्स यांनी यापूर्वी जुलै महिन्यात काँग्रेससमोर या धोरणाच्या समर्थनार्थ साक्ष दिली होती, तेव्हा त्यांनी स्वतःला नेवाडा येथील रहिवासी असल्याचे सांगितले होते. आता त्या अर्कांससमध्ये राहतात, मात्र केवळ एका दिवसासाठी त्या वॉशिंग्टन डीसीमध्ये ‘डोअरडॅश’ ड्रायव्हर कशा बनल्या, असा प्रश्न युजर्स विचारत आहेत.

डोअरडॅशचे स्पष्टीकरण

या वादानंतर ‘डोअरडॅश’चे प्रवक्ते ज्युलियन क्रॉली यांनी स्पष्टीकरण दिले आहे. त्यांनी म्हटले की, “ही काही ‘रिअल डिलिव्हरी’ (वास्तविक ऑर्डर) होती असा दावा कोणीही केलेला नाही. हे नवीन धोरण साजरे करण्यासाठी आयोजित केलेले एक नियोजित पाऊल होते. शेरोन या खऱ्या अर्थाने ‘डॅशर’ आहेत आणि त्यांना या धोरणाचा फायदा झाला आहे, म्हणून त्यांनी यात सहभाग नोंदवला. त्यांना ‘प्लांट’ किंवा ‘अभिनेत्री’ म्हणणे चुकीचे आहे.”