अमेरिकेतील मध्यावधी निवडणुकांचे निकाल नुकतेच जाहीर झाले असून, यामध्ये अमेरिकन जनतेनं युद्धाविरुद्ध आपला कौल दिल्याचा दावा इराणकडून करण्यात आला आहे. इराणच्या संसदेचे अध्यक्ष मोहम्मद बागेर गालिबाफ यांनी, अमेरिकन नागरिकांनी महागाई आणि युद्धातील लष्करी हस्तक्षेपाविरोधात मत दिल्याचं म्हटलं आहे. दुसरीकडे, अमेरिकेचे अध्यक्ष डोनाल्ड ट्रम्प यांनीही इराणमधील युद्धाचा फटका रिपब्लिकन पक्षाच्या निवडणुकीतील कामगिरीला बसल्याचं मान्य केलं आहे. या संदर्भातील वृत्त ‘द इंडियन एक्सप्रेस’ने दिले आहे.
मोहम्मद बागेर गालिबाफ नेमकं काय म्हणालेत?
इराणच्या संसदेचे अध्यक्ष मोहम्मद बागेर गालिबाफ यांनी सोशल मीडिया प्लॅटफॉर्म ‘X’ वर आपली भूमिका मांडली. “अमेरिकन जनतेने महागाई आणि युद्धाला थेट नकार दिला आहे, आम्ही या संदेशाचे स्वागत करतो. अमेरिकन सरकारनं जर आंतरराष्ट्रीय दबाव आणि स्वतःच्या फायद्यासाठी जनतेच्या इच्छेकडे दुर्लक्ष केलं, तर त्यांना याचे गंभीर परिणाम भोगावे लागतील,” असा इशारा त्यांनी दिला.
ट्रम्प यांची प्रामाणिक कबुली
दुसरीकडे, ‘फॉक्स न्यूज’ला दिलेल्या मुलाखतीत अमेरिकेचे अध्यक्ष डोनाल्ड ट्रम्प यांनी मध्यावधी निवडणुकांतील पराभवावर भाष्य केलं. “निवडणुकीतील या निकालांमागे इराणमधील युद्ध हे एक प्रमुख कारण होते, हे मी नाकारत नाही. मात्र, त्याच वेळी इराणबाबत मी घेतलेल्या कठोर भूमिकेचं महत्त्व नागरिकांना समजलं आहे,” असा दावा ट्रम्प यांनी केला.
या निवडणुकांमध्ये डेमोक्रॅटिक पक्षाने अमेरिकन संसदेच्या दोन्ही सभागृहांमध्ये बहुमत मिळवले आहे. त्यामुळे ट्रम्प यांच्यापुढील राजकीय अडचणी वाढल्या आहेत. डेमोक्रॅटिक पक्ष संसदेत काही कठोर विधेयके आणण्याची शक्यता असली तरी, योग्य मुद्द्यांवर एकत्र काम करण्याची तयारी ट्रम्प यांनी दर्शवली आहे.
महागाई आणि इराण युद्धाचा निवडणुकीवर प्रभाव
अमेरिकेत नुकत्याच पार पडलेल्या मध्यावधी निवडणुकांमध्ये डेमोक्रॅटिक पक्षाने दणदणीत विजय मिळवला. टेक्सस, साऊथ कॅरोलिना, ओहायो आणि कॅन्सस या पारंपरिक रिपब्लिकन पक्षाच्या बालेकिल्ल्यांमध्ये डेमोक्रॅट्सनी विजय मिळवत सत्ता हस्तगत केली.
अमेरिकेतील वाढती महागाई, इंधनाचे भडकलेले दर आणि इराणसोबत सुरू असलेले युद्ध या तीन प्रमुख मुद्द्यांवर अमेरिकन नागरिक नाराज होते. त्याचा थेट फटका रिपब्लिकन पक्षाला बसल्याचे या निकालांवरून स्पष्ट होत आहे.
