रशियाचे निर्बंधित तेलवाहू जहाज ब्रिटनच्या ताब्यात

इंग्लिश खाडीत छुप्या रीतीने वावरणार्‍या रशियाच्या ‘स्मिर्टोस’ या निर्बंधित तेलवाहू जहाजावर ब्रिटिश सशस्त्र दलाने रविवारी छापा टाकत ते ताब्यात घेतले. युक्रेनविरुद्धच्या युद्धामुळे रशियावर घालण्यात आलेल्या आंतरराष्ट्रीय निर्बंधांचे उल्लंघन केल्याप्रकरणी ही कारवाई करण्यात आली. ब्रिटनच्या नेतृत्वाखाली अशा प्रकारची ही पहिलीच मोहीम असल्याचे ब्रिटिश संरक्षण मंत्रालयाने स्पष्ट केले

मंत्रालयाने दिलेल्या माहितीनुसार, रॉयल मरीन कमांडोंनी हेलिकॉप्टरमधून दोरांच्या साहाय्याने जहाजावर उतरून ही कारवाई केली. पुढील तपासासाठी हे जहाज इंग्लंडच्या दक्षिण किनार्‍यालगत रोखून ठेवण्यात आले आहे.

दरम्यान, पंतप्रधान कीर स्टार्मर यांनी या कारवाईचे स्वागत केले. ‘ही मोहीम रशियाला आणखी एक मोठा धक्का देणारी ठरली आहे. युक्रेनमधील युद्धाला इंधन पुरविणार्‍यांना ते कुठेही लपू शकत नाहीत, याची जाणीव करून देणारी ही कारवाई आहे,’ असे त्यांनी सांगितले.

कॅमेरून देशाचा ध्वज फडकावणारे ‘स्मिर्टोस’ हे जहाज ५ जून रोजी रशियातील उस्त-लुगा बंदरातून इजिप्तमधील पोर्ट सईदकडे रवाना झाले होते.  दरम्यान, युक्रेनचे अध्यक्ष  वोलोदीमीर झेलेन्स्की यांनीही या कारवाईबाबत ब्रिटनचे आभार मानले.