US F-15 pilot rescue latest news: एका अमेरिकन सरकारी अधिकाऱ्याने ‘अल जझीरा’ला माहिती दिली आहे की, इराणमध्ये पाडण्यात आलेल्या F-15E फायटर जेटमधील दुसऱ्या क्रू मेंबरला (वैमानिकाला) तीव्र गोळीबारानंतर सुखरूप शोधण्यात आले आहे. बेपत्ता असलेला हा क्रू मेंबर आता सुरक्षित असल्याच्या वृत्ताला दुजोरा मिळाला आहे, मात्र तो अद्याप पूर्णपणे धोक्याबाहेर नाही. अहवालानुसार, बचाव पथकाला अजूनही इराणमधून यशस्वीरित्या बाहेर पडून सुरक्षित स्थळी पोहोचावे लागणार आहे.
इराणी सरकारी माध्यमांनी शुक्रवारी दिलेल्या वृत्तानुसार, इराणमध्ये अमेरिकेचे एक लढाऊ विमान पाडण्यात आले होते. यानंतर तेहरानमधील अधिकाऱ्यांनी विमानातील क्रू मेंबर्सना पकडून देणाऱ्यास बक्षीस देण्याची जाहीर घोषणा केली होती. एका सदस्याला यापूर्वीच शोधण्यात आले होते, परंतु दुसऱ्या सदस्याचे काय झाले, हे अस्पष्ट होते. यानंतर इराण आणि अमेरिका या दोन्ही देशांकडून व्यापक शोध आणि बचाव मोहीम राबवण्यात आली. इराणी सरकारी माध्यमांनी स्थानिक रहिवाशांना आवाहन केले होते की, त्यांनी कोणत्याही “शत्रू वैमानिकाला” पोलिसांच्या ताब्यात द्यावे, ज्यासाठी ६०,००० डॉलर्स (सुमारे ५० लाख रुपये) बक्षीस जाहीर करण्यात आले होते.
डोनाल्ड ट्रम्प काय म्हणाले?
“माझ्या अमेरिकन बांधवांनो, गेल्या काही तासांत अमेरिकन सैन्याने अमेरिकेच्या इतिहासातील सर्वात धाडसी ‘शोध आणि बचाव’ (Search and Rescue) मोहिमांपैकी एक यशस्वीरित्या पूर्ण केली आहे. आमचे एक विलक्षण क्रू मेंबर अधिकारी, जे एक अत्यंत सन्माननीय कर्नल देखील आहेत, ते आता पूर्णपणे सुरक्षित आहेत हे सांगताना मला अतिशय आनंद होत आहे. हा शूर योद्धा इराणच्या धोकादायक पर्वतरांगांमध्ये शत्रूच्या हद्दीत होता. आमचे शत्रू तासागणिक त्याच्या जवळ पोहोचत होते आणि त्याचा पाठलाग करत होते. परंतु, तो कधीही खऱ्या अर्थाने एकटा नव्हता; कारण त्याचे कमांडर-इन-चीफ, युद्ध सचिव (Secretary of War), जॉइंट चीफ ऑफ स्टाफचे अध्यक्ष आणि त्याचे सहकारी योद्धे २४ तास त्याच्या स्थानावर लक्ष ठेवून होते आणि त्याच्या सुटकेसाठी अत्यंत बारकाईने नियोजन करत होते”, असं डोनाल्ड ट्रम्प यांनी ट्रूथवर पोस्ट केलंय.
ते पुढे म्हणाले, “माझ्या निर्देशानुसार, अमेरिकन सैन्याने त्याला परत आणण्यासाठी जगातील सर्वात प्राणघातक शस्त्रांनी सज्ज असलेली डझनभर विमाने पाठवली. तो जखमी झाला आहे, पण तो लवकरच पूर्णपणे बरा होईल. ही चमत्कारिक बचाव मोहीम कालच्या दुसऱ्या एका शूर वैमानिकाच्या यशस्वी सुटकेनंतर राबवण्यात आली आहे. आमची दुसरी बचाव मोहीम धोक्यात येऊ नये म्हणून आम्ही कालच्या सुटकेच्या वृत्ताला अधिकृत दुजोरा दिला नव्हता. लष्करी इतिहासात पहिल्यांदाच दोन अमेरिकन वैमानिकांना शत्रूच्या प्रदेशातून, वेगवेगळ्या मोहिमांद्वारे सुखरूप बाहेर काढण्यात आले आहे. आम्ही कोणत्याही अमेरिकन योद्ध्याला शत्रूच्या हाती कधीही सोडून देणार नाही! एकही अमेरिकन सैनिक न गमावता किंवा कोणालाही इजा न होता आम्ही या दोन्ही मोहिमा फत्ते केल्या, यावरून हे पुन्हा एकदा सिद्ध झाले आहे की इराणच्या आकाशात आमचे वर्चस्व आणि श्रेष्ठत्व निर्विवाद आहे. हा असा क्षण आहे ज्याचा सर्व अमेरिकन नागरिकांनी—मग ते रिपब्लिकन असोत, डेमॉक्रॅट असोत किंवा इतर कोणीही अभिमान वाटला पाहिजे आणि सर्वांनी एकत्र आले पाहिजे. आपल्याकडे खरोखरच जगाच्या इतिहासातील सर्वोत्कृष्ट, अत्यंत व्यावसायिक आणि प्राणघातक सैन्य आहे.”
पाडलेले विमान आणि बेपत्ता वैमानिकाबाबत ट्रम्प काय म्हणाले होते?
या घडामोडींनंतरही, ट्रम्प यांनी शनिवारी त्यांच्या ‘ट्रुथ सोशल’ प्लॅटफॉर्मवर एक संदेश पोस्ट केला. यात त्यांनी म्हटले आहे की, “इराणकडे करार करण्यासाठी किंवा धोरणात्मक समुद्री मार्ग पुन्हा खुला करण्यासाठी ४८ तासांचा वेळ आहे, अन्यथा त्यांच्यावर मोठा हल्ला केला जाईल.” त्यांनी हे देखील स्पष्ट केले की, इराणमधील F-15 फायटर जेट पाडल्याचा आणि वैमानिक बेपत्ता असल्याचा तेहरानसोबत सुरू असलेल्या चर्चेवर कोणताही परिणाम होणार नाही.
या घटनेमुळे वाटाघाटींमध्ये अडथळा येईल का, हा विचार फेटाळून लावताना राष्ट्राध्यक्षांनी एनबीसी न्यूजला सांगितले, “नाही, मुळीच नाही. हे युद्ध आहे. आपण युद्धात आहोत.” युद्ध सुरू असताना अमेरिकन विमान गमावल्याच्या घटनेवर ट्रम्प यांनी दिलेली ही पहिली सार्वजनिक प्रतिक्रिया होती. ही प्रतिक्रिया अशा वेळी आली आहे जेव्हा युद्ध आणि राजनैतिक प्रयत्न दोन्ही एकाच वेळी सुरू आहेत.
