उत्तर प्रदेश विधानसभा निवडणुकीत गोरखपूर शहर मतदारसंघातून मुख्यमंत्री योगी आदित्यनाथ यांच्याविरुद्ध आझाद समाज पार्टी (कांशीराम) या पक्षाचे नेते चंद्रशेखर आझाद यांच्या उमेदवारीची घोषणा या पक्षाने गुरुवारी केली. आपण भाजपविरुद्धचा आपला लढा सुरू ठेवू, असे आझाद यांनी म्हटले आहे. गोरखपूरमधून पाच वेळा खासदार म्हणून लोकसभेवर निवडून गेलेले योगी आदित्यनाथ हे गोरखपूर शहर मतदारसंघातून विधानसभा निवडणूक लढवतील, असे भाजपने अलीकडेच जाहीर केले होते. ‘बहुजन हिताय, बहुजन सुखाय’साठी डॉ. बाबासाहेब आंबेडकर व कांशीराम यांची विचारसरणी पुढे नेत आम्ही चंद्रशेखर आझाद यांना या मतदारसंघातील उमेदवार जाहीर करत आहोत,’ असे पक्षाने समाजमाध्यमावरील एका निवेदनात सांगितले.