Varanasi student harassment incident and viral video details : शेअर रिक्षाने प्रवास करताना महिला प्रवाशांना अनेक अडचणींचा सामना करावा लागतो. शेअर रिक्षात असलेल्या पुरुष सहप्रवाशांपासून स्वतःला सावरत महिला प्रवास करत असतात. पण काही आंबटशौकिन प्रवासी महिलांना मिळेल त्या पद्धतीने त्रास देण्याचा प्रयत्न करतात. वाराणसीतही असा प्रकार समोर आलाय. पण संबंधित तरुणीने घाबरून न जाता नराधमाला अद्दल घडवली आहे.
वाराणसीमधील एका विद्यार्थिनीने शेअर केलेल्या व्हिडिओमुळे सार्वजनिक ठिकाणच्या छेडछाडीच्या प्रश्नाकडे पुन्हा एकदा लक्ष वेधले गेले असून, महिलांच्या सुरक्षिततेबाबत गंभीर चिंता व्यक्त केली जात आहे. बनारस हिंदू विद्यापीठाची (BHU) विद्यार्थिनी अनाया हिने एक व्हिडिओ शेअर केला आहे. कॉलेजला जात असताना रिक्षातील एका पुरुष सहप्रवाशाने तिला जाणीवपूर्वक स्पर्श केल्याचा आरोप तिने केला आहे. अनायाने या घटनेचे चित्रीकरण केले, मात्र आपण रेकॉर्ड होत आहोत हे लक्षात येताच आरोपीने तिथून पळ काढला.
या घटनेचे वर्णन करताना अनायाने लिहिले, “आज कॉलेजला जात असताना, रिक्षातील एका मुलाने मला जाणीवपूर्वक स्पर्श करण्याचा प्रयत्न केला. मी व्हिडिओ रेकॉर्ड करायला सुरुवात करताच तो खाली उतरला आणि पळून गेला. हेच आमचे वास्तव आहे… मुलींसाठी सुरक्षितता अजूनही एका स्वप्नासारखी वाटते.”
तिच्या या विधानाने अनेकांचे लक्ष वेधून घेतले असून, सार्वजनिक वाहतुकीमध्ये महिलांना रोज येणाऱ्या भीतीचे प्रतिबिंब यात उमटले आहे. हा व्हिडिओ इंस्टाग्राम आणि X (ट्विटर) सारख्या प्लॅटफॉर्मवर वेगाने व्हायरल झाला. युजर्सनी या घटनेचा तीव्र निषेध केला असून दोषींवर कडक कारवाई करण्याची मागणी केली आहे. अशा प्रकारचे वर्तन अनेकदा नोंदवलेच जात नाही, असेही अनेकांनी नमूद केले.
नेटकऱ्यांच्या संतप्त प्रतिक्रिया
अनेक युजर्सने वाराणसी पोलिसांसह स्थानिक प्रशासनाला टॅग करून आरोपीची ओळख पटवून त्याला अटक करण्याची विनंती केली आहे. एका युजरने लिहिले, “अशा लोकांची ओळख पटवून त्यांना शिक्षा झालीच पाहिजे. असुरक्षित तरुण मुली कधीही सोपे लक्ष्य बनू नयेत. न्याय जलद आणि कडक असायला हवा.”
दुसऱ्या एकाने प्रतिक्रिया दिली, “हे अस्वीकार्य आहे आणि दुर्दैवाने ही काही दुर्मिळ घटना नाही. कॉलेजला जाताना किंवा कुठेही जाताना कोणालाही आपल्या सुरक्षिततेबद्दल भीती वाटू नये. विरोध केल्यावर तो पळाला याचाच अर्थ त्याला स्वतःच्या कृत्याची जाणीव होती. केवळ शिक्षा नाही, तर जबाबदारी निश्चित होणे आवश्यक आहे जेणेकरून इतर असा विचार करताना दहा वेळा विचार करतील. महिला सुरक्षा हा केवळ ‘विषय’ नसून तो एक मूलभूत अधिकार आहे.” तिसऱ्या एका युजरने म्हटले, “आम्हाला रिक्षाचालकांची कडक पडताळणी, कॅम्पस परिसरात उत्तम गस्त आणि अशा गुन्हेगारांची त्वरित ओळख पटवण्याची गरज आहे. काशीमधील सुरक्षा हे केवळ स्वप्न राहू नये.”
