कोलकाता विमानतळावर परदेशी चलनाच्या जप्तीसंबंधी एक चक्रावून टाकणारी घटना समोर आली आहे. कोलकाता विमानतळावर सीमाशुल्क विभागाच्या अधिकाऱ्यांनी बँकॉकला जाणाऱ्या सामानाची तपासणी केली असता, गुटखाच्या पुड्यांमध्ये तब्बल ४० हजार अमेरिकन डॉलर (३२७८००० रुपये) आढळून आले. सीमाशुल्क विभागाने या कारवाईचा एक व्हिडिओही शेअर केला आहे. ज्यामध्ये गुटखाच्या छोट्या पुड्यांमध्ये अमेरिकन डॉलर्सच्या नोटा घडीकरून टाकण्यात आलेल्या होत्या. या पुड्या फोडून त्यातून ही रोकड जप्त करण्यात आली. एवढी मोठी रक्कम अशाप्रकारे नेली जात असल्याचे पाहून कस्टम अधिकारीही चक्रावले होते. मागील काही दिवसांत कोलकातामध्ये परदेशी चलनाशी संबंधित अनेक प्रकरणं समोर आली आहेत. मात्र असे पहिल्यांदाच घडले आहे की, गुटखाच्या पुड्यांमधून परदेशी चलन जप्त करण्यात आले. यासंदर्भात सीमाशुल्क विभागाने सांगितल्यानुसार, गुप्त माहितीच्या आधारावर कारवाई करून AIU अधिकाऱ्यांनी इमिग्रेशन औपचारिकतेनंतर ८ जानेवारी रोजी बँकॉकला रवाना होणाऱ्या सामानाची तपासणी केली, असताना गुटखाच्या पुड्यांमध्ये लपवलेले ४० हजार अमेरिकन डॉलर आढळले, जे की जप्त करण्यात आले आहे.
