“मुख्यमंत्री विजय हे एखाद्या रिलस्टारप्रमाणे वावरतात”; उदयनिधी यांच्या अटकेनंतर एम.के. स्टॅलिन यांची बोचरी टीका

एम. के. स्टॅलिन काय म्हणाले?

मुख्यमंत्री विजय हे एखाद्या रिलस्टारप्रमाणे हिंडत असतात. शिवाय त्यांचं वर्तन हे अहंकाराने भरलेलं आहे. विधानसभेचं अर्थसंकल्पीय अधिवेशन सुरु होतं आहे त्याच्या एक दिवस आधी विरोधी पक्षनेत्यालाच दूर ठेवायचं हा प्रयत्न होता त्यातूनच उदयनिधी स्टॅलिन यांना अटक करण्यात आली अशीही टीका एम. के. स्टॅलिन यांनी केली. लोकांचे मूळ प्रश्न सोडवण्यापासून सरकार पळतं आहे. शिवाय या प्रश्नांकडे दुर्लक्ष झालं पाहिजे म्हणून हे अटकनाट्य केलं गेलं. इथे मुलांचे, विद्यार्थ्यांचे प्रश्न आहेत त्याकडे विजय सरकारचं मुळीच लक्ष नाही. विजय हे एखाद्या रिलस्टार प्रमाणे वावरत असतात असंही एम.के. स्टॅलिन म्हणाले.

नेमकं प्रकरण काय आहे?

तंजावूर येथे कर्नाटक-तमिळनाडू कावेरी नदी पाणीवाटप वादासंदर्भात सभा होती. या सभेला उदयनिधी स्टॅलिन संबोधित करत होते. ते बोलायला सुरुवात करणार तेवढ्यातच त्रिशा… त्रिशा… अशा घोषणा करण्यात आल्या. त्यामुळे उदयनिधी स्टॅलिन काही क्षण थांबले. नंतर स्मितहास्य करत कावेर नदी प्रकल्पाचा उल्लेख करत त्यांनी एक टिप्पणी केली. त्यांच्या वक्तव्यानंतर समर्थकांनी जल्लोष केला. TVK च्या आरोपानुसार, उदयनिधी स्टॅलिन यांनी केलेली टिप्पणी अभिनेत्री त्रिशा कृष्णन यांच्याबाबत दुहेरी अर्थ असलेली आणि आक्षेपार्ह होती. पक्षाचे आमदार रेवन्थ चरण यांनी या वक्तव्याचा निषेध करत ते वक्तव्य अत्यंत घृणास्पद असल्याचं म्हटलं. तसंच DMK नेतृत्वामुळे राजकीय चर्चेची पातळी घसरल्याचा आरोपही त्यांनी केला. एनडीटीव्हीने हे वृत्त दिलं आहे.

विरोधकांकडून आणि सोशल मीडियावर टीका

रेवन्थ चरण यांनी म्हटलं की, “कोणत्याही व्यक्तीबद्दल अशा प्रकारच्या अपमानास्पद टिप्पणी करणे पूर्णपणे अस्वीकार्य आहे. यावरून संबंधितांची मानसिकता, राजकीय संस्कृती आणि राजकारणातील घसरलेली पातळी स्पष्ट होते.” MDMK चे प्रमुख सचिव आणि राज्यसभा खासदार दुरई वायको यांनीही या कथित वक्तव्याचा निषेध केला. “ही सभा कावेरी प्रश्न आणि तमिळनाडूतील शेतकऱ्यांच्या समस्यांवर केंद्रित असायला हवी होती. अशा प्रकारची महिलांविरोधातील टिप्पणी निषेधार्ह असून वैयक्तिक हिशेब चुकते करण्यासाठी हे व्यासपीठ नव्हते”, असं त्यांनी म्हटलं. सोशल मीडियावरही अनेकांनी उदयनिधी स्टॅलिन यांच्यावर टीका केली. काहींनी त्यांच्या वक्तव्याला अश्लील आणि महिलांचा अपमान करणारं संबोधलं, तर काहींनी ते स्वस्त लोकप्रियता मिळवण्याचा प्रयत्न असल्याचं म्हटलं.