Vijay’s TVK party supporter attempted suicide following false rumors about election results: तमिळनाडूसह पाच राज्यांमधील विधानसभा निवडणुकांच्या मतमोजणीला सोमवारी (४ मे २०२६) सकाळी सुरुवात झाली आहे. दरम्यान, तामिळनाडूच्या कृष्णगिरी जिल्ह्यात एक धक्कादायक घटना उघडकीस आली आहे. येथे, अभिनेता आणि ‘टीव्हीके’ (TVK) पक्षाचे प्रमुख विजय यांचा निवडणुकीत कथित पराभव झाल्याच्या अफवा ऐकून एका २८ वर्षीय तरुणाने आत्महत्येचा प्रयत्न केला.
‘द टाइम्स ऑफ इंडिया’च्या एका वृत्तानुसार, पोलिसांनी दिलेल्या माहितीनुसार या तरुणाचे नाव के. महेंद्रन असे आहे. महेंद्रन हा विजय यांचा कट्टर समर्थक असल्याचे सांगितले जाते. मतमोजणी सुरू होण्याच्या अगदी आधीच ही घटना घडली. मिळालेल्या माहितीनुसार, या अफवा ऐकून महेंद्रन अत्यंत व्यथित झाला आणि त्याने आपल्या घराच्या जवळच गळ्यावर वार करून स्वतःचे जीवन संपवण्याचा प्रयत्न केला.
घटनास्थळी उपस्थित असलेल्या प्रत्यक्षदर्शींनी तात्काळ हस्तक्षेप केला, जखमी महेंद्रनला सुखरूप बाहेर काढले आणि त्याला जवळच्या सरकारी रुग्णालयात दाखल केले. सध्या तो कृष्णागिरी शासकीय वैद्यकीय महाविद्यालय व रुग्णालयात दाखल असून, तिथे त्याच्यावर उपचार सुरू आहेत.
कृष्णगिरी शहर पोलीस ठाण्यातील एका अधिकाऱ्याने सांगितले की, त्या तरुणाची प्रकृती चिंताजनक आहे. मात्र सध्या डॉक्टरांच्या देखरेखीखाली त्याच्यावर उपचार सुरू आहेत. पोलीस या प्रकरणाचा तपास करत असून, या घटनेमागील नेमक्या परिस्थितीचा उलगडा करण्याचा प्रयत्न करत आहेत.
सध्याच्या निवडणूक वातावरणात, अफवांचा होणारा परिणाम आणि समर्थकांच्या भावनिक प्रतिक्रिया यांविषयीची चिंता या घटनेमुळे अधिकच वाढली आहे.
तामिळनाडू विधानसभा निवडणुकीची मतमोजणी सध्या सुरू आहे. आतापर्यंत समोर येत असलेल्या कलानुसार, विजय यांचा पक्ष ‘टीव्हीके’ने (TVK) आघाडी कायम राखली आहे. दुसऱ्या क्रमांकावर ‘एआयएडीएमके-भाजपा’ युती असून, मुख्यमंत्री स्टॅलिन यांचा पक्ष ‘डीएमके’ तिसऱ्या स्थानी घसरला आहे.
‘टीव्हीके’ १०० हून अधिक जागांवर आघाडीवर आहे, तर ‘एआयएडीएमके-भाजपा’ युती ७२ जागांवर आणि ‘डीएमके’ ५६ जागांवर आघाडीवर आहे.
आम्ही पूर्ण बहुमताने सरकार स्थापन करू: टीव्हीके
तामिझगा वेट्री कझगम (TVK) चे राष्ट्रीय प्रवक्ते फेलिक्स जेराल्ड यांनी सोमवारी असा विश्वास व्यक्त केला की, त्यांचा पक्ष तामिळनाडूमध्ये पूर्ण बहुमताने सरकार स्थापन करेल. कारण निवडणुकीच्या सुरुवातीच्या कलांनुसार, पक्षाला “प्रचंड पाठिंबा” मिळत असल्याचे दिसून येत आहे. पीटीआयशी बोलताना जेराल्ड यांनी सांगितले की, निवडणुकीचे निकाल अपेक्षित आहेत. त्यांनी ठामपणे सांगितले की, तामिळनाडूच्या जनतेने TVK ची निवड केली आहे, कारण ते सध्या सत्तेवर असलेल्या पक्षांना कंटाळले आहेत. “अर्थात, त्यांच्याकडे (सत्तेवर असलेल्या पक्षांकडे) ५० किंवा ७५ वर्षांचा अनुभव आहे. परंतु त्यांनी या अनुभवाचा वापर केवळ राज्याची लूट करण्यासाठीच केला आहे”, असे ते म्हणाले.
