तिहार कारागृहात गुरुवारी आणखी एका महिला कैद्याने आत्महत्या केली. दिल्ली सामुहिक बलात्कार प्रकरणातील आरोपी रामसिंग याने गेल्या सोमवारीच कारगृहातील खोलीमध्ये आपल्याजवळील कपड्यांच्या साह्याने गळफास घेऊन आत्महत्या केली होती. त्यानंतर आज पुन्हा एका महिला कैद्याने आत्महत्या केल्याचे आढळले.रेश्मा असे या महिला कैद्याचे नाव आहे. अपहरणाच्या गुन्ह्यात ती २०११ पासून तिहार कारागृहात शिक्षा भोगत होती. गुरुवारी दुपारी कारागृहातील खोलीमध्ये रेश्माने गळफास घेतल्याचे आढळले. त्यानंतर तातडीने तिला दिनदयाळ उपाध्याय रुग्णालयात दाखल करण्यात आले. तिथे तिला मृत घोषित करण्यात आले. कडेकोट सुरक्षाव्यवस्था असलेल्या तिहार कारागृहातील गेल्या १५ महिन्यांतील ही चौथी आत्महत्या आहे.
