ना जाहिरात, ना सेलिब्रिटी ब्रँडिंग; तरीही जगभर गाजली ‘ओल्ड मंक’, कधीही दारू न पिणाऱ्या व्यक्तीने उभा केला करोडोंचा ब्रँड

जाहिरातींशिवाय लोकप्रिय झालेला ब्रँड (A brand that became popular without advertising)

भारतातील सर्वाधिक लोकप्रिय रम ब्रँडमध्ये ओल्ड मंकचे नाव अग्रस्थानी घेतले जाते. न्यूज18च्या वृत्तानुसार, विशेष म्हणजे या ब्रँडने कधीही मोठ्या जाहिराती, सेलिब्रिटी प्रचार किंवा आक्रमक मार्केटिंगचा आधार घेतला नाही. तरीही बार, लष्करी कॅन्टीन आणि दारूच्या दुकानांमध्ये आजही तिची ओळख कायम आहे. पिढ्यान् पिढ्या ग्राहकांनी केवळ गुणवत्तेच्या जोरावर या ब्रँडला लोकप्रियतेच्या शिखरावर नेले.

दशकानुदशके बदलला नाही स्वाद ( The taste hasn’t changed for decades)

१९५० च्या दशकात बाजारात आलेल्या ओल्ड मंकच्या चवीत फारसा बदल झालेला नाही. कॅरॅमल, व्हॅनिला आणि चॉकलेटच्या सौम्य फ्लेव्हरमुळे या रमची वेगळी ओळख तयार झाली. अनेक ब्रँड्स काळानुसार बदलत गेले, पण ओल्ड मंकने आपली मूळ ओळख कायम ठेवली आणि हेच तिच्या यशाचे मोठे कारण मानले जाते.

दारू न पिणाऱ्या व्यक्तीने घडवला इतिहास (A non-drinker made history)

ओल्ड मंकच्या यशामागची सर्वात आश्चर्यकारक गोष्ट म्हणजे तिचे माजी प्रमुख कपिल मोहन. निवृत्त लष्करी अधिकारी असलेले कपिल मोहन स्वतः मद्यपान करत नव्हते. चहाचे शौकीन असलेल्या कपिल मोहन यांनी आपल्या मोठ्या भावाच्या निधनानंतर मोहन मीकिन कंपनीची धुरा सांभाळली. त्यांच्या नेतृत्वाखाली ओल्ड मंकने देशातच नव्हे तर जगभरात लोकप्रियता मिळवली. सन २००० पर्यंत ती जगातील सर्वाधिक विक्री होणाऱ्या डार्क रमपैकी एक ठरली होती.

नावामागचे गूढ आजही कायम (The mystery behind the name still persists today)

‘ओल्ड मंक’ हे नाव कसे पडले, याचे अधिकृत उत्तर आजही उपलब्ध नाही. काहींच्या मते मठांमध्ये लाकडी पिंपांमध्ये मद्य साठवण्याच्या परंपरेतून हे नाव आले, तर काहींच्या मते या रमच्या परिपक्व चवीमुळे ‘ओल्ड मंक’ हे नाव निवडण्यात आले. तिची वैशिष्ट्यपूर्ण बाटलीही दशकानुदशके जवळपास तशीच राहिली आहे.

मार्केटिंगपेक्षा गुणवत्तेवर भर (Emphasis on quality over marketing)

कपिल मोहन यांनी ओल्ड मंकसाठी जाहिरातींवर फारसा भर दिला नाही. त्यांच्या मते उत्पादनाची गुणवत्ता हीच सर्वोत्तम जाहिरात असते. ग्राहकांच्या तोंडी प्रचारामुळेच हा ब्रँड वाढत गेला. काही वर्षांपूर्वी ओल्ड मंकचे उत्पादन बंद होणार असल्याच्या अफवा पसरल्या होत्या. मात्र कंपनीला पुढे येऊन त्या फेटाळाव्या लागल्या.

भारतातून जगभर (From India to the world)

मोहन मीकिन कंपनीचा इतिहास ब्रिटिशकालीन भारतापर्यंत पोहोचतो. १८८५ मध्ये सुरू झालेल्या बिअर उत्पादन करणारा कारखान्यापासून (ब्रुअरी) या कंपनीचा प्रवास सुरू झाला. स्वातंत्र्यानंतर ती भारतीय मालकीची कंपनी बनली. पुढे ओल्ड मंकने ब्रिटन, अमेरिका, जपान, जर्मनी, कॅनडा, यूएईसह ५० हून अधिक देशांमध्ये आपले स्थान निर्माण केले.

ट्रेंड बदलले, पण ओल्ड मंकची ओळख कायम (ट्रेंड बदलले, पण ओल्ड मंकची ओळख कायम)

आजच्या काळात अनेक ब्रँड्स सोशल मीडिया, इन्फ्लुएन्सर्स आणि मोठ्या जाहिरातींवर अवलंबून असतात. मात्र ओल्ड मंकने गुणवत्ता, सातत्य आणि ग्राहकांचा विश्वास यावरच आपली ओळख निर्माण केली. म्हणूनच आज वादाच्या निमित्ताने पुन्हा चर्चेत आलेल्या या ब्रँडची कहाणी तितकीच रंजक आणि प्रेरणादायी ठरते.