तुमच्या स्मार्टफोनच्या खाली चार्जिंग पोर्टजवळचं ते छोटंसं छिद्र कशासाठी असतं तुम्हाला माहितीये का? ९०% लोकांना माहित नाही त्याचं खरं काम

मात्र, आपण दररोज अनेक तास हाताळत असलेल्या स्मार्टफोनमध्ये अशी अनेक वैशिष्ट्ये असतात, ज्यांची माहिती बहुतेकांना नसते. फोनवरील प्रत्येक बटण, प्रत्येक सेन्सर किंवा प्रत्येक छोटा भाग काही ना काही महत्त्वाचे काम करत असतो. त्यापैकीच एक म्हणजे चार्जिंग पोर्टजवळ दिसणारे अगदी बारीक छिद्र. अनेकांना वाटते की, ते केवळ डिझाईनचा भाग आहे किंवा हवा जाण्यासाठी दिलेले छिद्र आहे; पण प्रत्यक्षात त्यामागे एक महत्त्वाचे तांत्रिक कारण असते.

छोटंसं छिद्र… पण काम मात्र मोठं

स्मार्टफोनच्या खालच्या बाजूला चार्जिंग पोर्टजवळ दिसणारे हे बारीक छिद्र प्रत्यक्षात मायक्रोफोनपैकी एक असते. अनेक स्मार्टफोनमध्ये ते मुख्य मायक्रोफोन म्हणून वापरले जाते; तर काही मॉडेल्समध्ये आवाज अधिक स्पष्ट करण्यासाठी ते महत्त्वाची भूमिका बजावत असते. काही स्मार्टफोनमध्ये नॉईज कॅन्सलेशनसाठी वरच्या बाजूला स्वतंत्र मायक्रोफोन दिलेला असतो.

याच कारणामुळे तुम्ही फोनवर बोलताना ऐकणाऱ्याला तुमचा आवाज स्पष्टपणे ऐकणे शक्य होते. तुम्ही बोललेले शब्द अचूकपणे समोरच्या व्यक्तीपर्यंत पोहोचावेत, यासाठी हा मायक्रोफोन सतत कार्यरत असतो.

गोंगाटातही तुमचा आवाज कसा ऐकू जातो?

तुम्ही कधी गर्दीच्या बाजारात, रेल्वेस्थानकावर किंवा वाहतुकीच्या गोंगाटात फोनवर बोलला असाल, तर एक गोष्ट तुमच्या नक्की लक्षात आली असेल… आजूबाजूला मोठा आवाज असतानाही समोरच्या व्यक्तीला तुमचा आवाज बऱ्यापैकी स्पष्टपणे ऐकू येतो. त्यामागे स्मार्टफोनमधील मायक्रोफोन प्रणाली आणि नॉईज रिडक्शन तंत्रज्ञान महत्त्वाची भूमिका बजावते.

फोनमधील मायक्रोफोन तुमचा आवाज टिपतो; तर स्मार्टफोनमधील सॉफ्टवेअर आणि काही मॉडेल्समधील अतिरिक्त मायक्रोफोन आसपासचा अनावश्यक आवाज कमी करण्याचा प्रयत्न करतात. त्यामुळे कॉलची गुणवत्ता सुधारते आणि संभाषण अधिक स्पष्ट होते.

या छोट्या छिद्रात पिन घालण्याची चूक करू नका

अनेक जण हे छिद्र सिम ट्रेच्या छिद्रासारखे समजून त्यामध्ये पिन, सुई किंवा इतर टोकदार वस्तू घालतात. मात्र, ही चूक महागात पडू शकते. कारण- त्यामुळे मायक्रोफोन खराब होण्याची शक्यता असते आणि त्याचा परिणाम कॉलिंग, व्हॉईस रेकॉर्डिंग तसेच व्हॉईस कमांडसारख्या सुविधांवर होऊ शकतो.

म्हणूनच चार्जिंग पोर्टजवळ दिसणाऱ्या या लहान छिद्रात कोणतीही वस्तू घालणे टाळावे. फोन स्वच्छ करतानाही याबाबत विशेष काळजी घेणे आवश्यक आहे.

प्रत्येक फोनची रचना सारखी नसते

सर्व स्मार्टफोनची रचना एकसारखी नसते. काही कंपन्या मायक्रोफोनची जागा खालच्या बाजूला ठेवतात; तर काही मॉडेल्समध्ये वरच्या बाजूला अतिरिक्त मायक्रोफोन असतो. त्यामुळे तुमच्या फोनमधील प्रत्येक छिद्राचे कार्य एकसारखे असेलच, असे नाही. याची खात्री करण्यासाठी संबंधित कंपनीच्या अधिकृत मार्गदर्शक पुस्तिकेचा किंवा संकेतस्थळावरील माहितीचा आधार घ्यावा.

छोटा भाग; पण मोठी जबाबदारी

स्मार्टफोनमध्ये दिसणारे हे छोटेखानी छिद्र आकाराने जरी लहान असले तरी तुमचा आवाज स्पष्टपणे पोहोचवण्यामध्ये त्याची भूमिका अत्यंत महत्त्वाची आहे. त्यामुळे पुढच्या वेळी चार्जिंग पोर्टजवळ हे बारीक छिद्र दिसले, तर ते केवळ डिझाईनचा भाग नसून तुमच्या फोनच्या महत्त्वाच्या तांत्रिक यंत्रणेतील एक आवश्यक घटक असल्याचे लक्षात ठेवा.