Lok Sabha Election 2019 : लोकसभेच्या निवडणुकीत दक्षिण भारतातून १३० जागा आहेत. कर्नाटकमध्ये भाजपने जोरदार मुसंडी मारली आहे. या राज्यात काँग्रेस आणि जनता दल सेक्युलर या दोन पक्षांची आघाडी विरुद्ध भाजपा अशी लढत होती. कर्नाटकमध्ये लोकसभेच्या एकूण २८ जागा आहेत. त्यापैकी भाजपा २४ जागांवर भाजपा विजय मिळवण्याच्या मार्गावर आहे. तर दुसरीकडे आंध्र प्रदेशचे मुख्यमंत्री आणि तेलुगू देसमचे नेत चंद्राबाबू नायडू यांना मोठा धक्का बसला आहे. कारण आंध्र प्रदेशमध्ये जगनमोहन रेड्डी यांच्या नेतृत्वाखालील वायएसआर काँग्रेसने क्लिन स्वीप केलं आहे. तामिळनाडूमध्ये द्रमुक आणि काँग्रेसने जोरदार मुसंडी मारली आहे. डीमके आणि काँग्रेस आघाडी तामिळनाडूत ३६ जागांवर विजयी तर एआयएडीएमकेनं २ जागा मिळवल्या आहेत. तामिळनाडूमध्ये लोकसभेच्या ३९ जागा आहेत पण या राज्यात वेल्लोरची निवडणूक रद्द करण्याची कारवाई झाली होती. तामिळनाडूत एम. करुणानिधी आणि जयललिता या दोन दिग्गज नेत्यांच्या निधनानंतर राज्यात पहिल्यांदाच लोकसभेसाठी निवडणूक पार पडली. गेल्या निवडणुकीत जयललिता यांच्या एआयएडीएमके पक्षाने ३९ पैकी ३७ जागांवर विजय मिळवत आपला झेंडा फडकवला होता. मात्र, यंदाच्या लोकसभा निवडणुकीत एआयएडीएमकेला शह देण्यासाठी एम. करुणानिधींची डीएमके पार्टी संपूर्ण ताकदीनीशी रिंगणात उतरली. केरळमध्ये काँग्रेसच्या नेतृ्त्वाखालील युनायटेड डेमोक्रॅटीक फ्रंटने २० पैकी १९ जागांवर विजय मिळवला आहे. तर तेलंगणामधल्या लोकसभा निवडणुकीत अपेक्षेप्रमाणेच चंद्रशेखर राव यांच्या तेलंगणा राष्ट्र समितीला यश मिळालं आहे.
