मनसे अध्यक्ष राज ठाकरे यांनी लोकसभा निवडणुकीच्या प्रचारात भाषणाचा एक नवा ट्रेंड आणला आहे. भाषण सुरु असताना ते जुने व्हिडिओ दाखवून सत्ताधाऱ्यांचा बुरखा फाडत आहेत. आज महाड येथील सभेमध्ये त्यांनी पंतप्रधान नरेंद्र मोदींनी दत्तक घेतलेल्या गावातील स्थिती दाखवून दिली. नरेंद्र मोदी यांनी खासदारांसाठी गाव दत्तक घेण्याची योजना आणली होती. आदर्श गाव कसे असावे याचे मॉडेल म्हणून दत्तक गावाचा विकास करायची योजना आहे. पंतप्रधान नरेंद्र मोदींनी दत्तक घेतलेल्या गावात किती भीषण परिस्थिती आहे ते राज यांनी आज व्हिडिओच्या माध्यमातून दाखवून दिले. नरेंद्र मोदींनी दत्तक घेतलेल्या गावात खूप वाईट परिस्थिती आहे. तिथे काहीही काम झालेलं नाही. कॉलेज नाही, नाल्याची व्यवस्था झालेली नाही. लोकांना आजही चिखलातून मार्ग काढत चालावे लागत असल्याची तक्रार त्या दत्तक घेतलेल्या गावातील लोक करत असल्याचे व्हिडिओमध्ये दाखवले आहे. नरेंद्र मोदींना स्वत: दत्तक घेतलेल्या गावाकडे बघायला वेळ नाही तर ते तुमच्याकडे काय बघणार ? असा सवाल त्यांनी केला.
