बाळासाहेबांच्या जन्मशताब्दी वर्षात मुंबईत शिवसेनेचा महापौर होईल का? एकनाथ शिंदेंचं उत्तर, “आम्ही…”

काय म्हटलं आहे एकनाथ शिंदेंनी?

“२०१९ ला जनमताचा अनादर करत ठाकरेंनी वेगळी सत्ता स्थापन केली, तसं आम्ही करणार नाही. आम्ही जनमताचा आदर करतो. बाळासाहेबांचा आशीर्वाद, नरेंद्र मोदींच्या मार्गदर्शनाखाली या निवडणुका लढल्या गेल्या. त्यानुसार ज्या ज्या ठिकाणी आम्ही महायुतीत लढलो त्या त्या ठिकाणी महायुतीचाच महापौर निवडून येणार.” ठाणे आणि कल्याणमध्ये अडीच वर्षांच्या महापौरपदाची चर्चा सुरू असल्याची माहिती आहे. त्यावर बोलताना एकनाथ शिंदे म्हणाले की, या विरोधकांनी पसरवलेल्या अफवा आहेत. आमची लढाई ही सत्ता खुर्चीसाठी नाही, आमची लढाई ही मुंबईच्या विकासासाठी आहे. मुंबईकरांना आम्ही काय देणार आहोत यावर आम्ही लक्ष दिलं आहे.

नगरसेवक हॉटेलमध्ये का आहेत?

शिंदेंच्या शिवसेनेच्या नवनियुक्त नगरसेवकांना हॉटेलमध्ये ठेवण्यात आलं आहे. त्यावर बोलताना एकनाथ शिंदे म्हणाले की, आमच्या पक्षाची बैठक घेतली, नव्याने निवडून आल्यानंतर त्यांना मार्गदर्शन केलं. पुढच्या पाच वर्षात त्यांनी काय काम करायचं याबद्दल त्यांना मार्गदर्शन करण्यात आलं.एकनाथ शिंदे यांच्या शिवसेनेचे सर्व नगरसेवक हे मुंबतील ताज लँड हॉटेलमध्ये मुक्कामी आहेत. त्यामुळे आता ताज हॉटेलमधील पॉलिटिक्सला वेग आल्याचं दिसतंय. शिंदेंच्या नवनिर्वाचित नगरसेवकांचा पालिकेतील ‘गट’ तातडीने स्थापन केला जाणार असल्याची माहिती आहे.

मुंबईत महायुतीचाच महापौर होईल-एकनाथ शिंदे

शिवसेना आणि भाजप हे मुंबई महानगरपालिकेत महायुती एकत्र निवडणूक लढले असून मुंबईत महायुतीचा महापौर होईल असे उपमुख्यमंत्री एकनाथ शिंदे यांनी स्पष्ट केले आहे. ठाणे, कल्याण-डोंबिवली, उल्हासनगर यासह महायुती म्हणून जिथे जिथे एकत्र निवडणूक लढलो त्याठिकाणी महायुतीचाच महापौर होईल असं सांगितलं. बाळासाहेब ठाकरेंची जन्मशताब्दी आहे त्यामुळे मुंबईत शिवसेनेचा महापौर बसणार का? हे विचारलं असता एकनाथ शिंदे म्हणाले की कार्यकर्त्यांची अशी भावना असू शकते. मात्र याबाबत आमची चर्चा व्हायची आहे असंही एकनाथ शिंदेंनी सांगितलं.