“…तर मुंबईत उद्धव ठाकरेंच्या पक्षाचा महापौर होऊ शकतो”; असीम सरोदेंनी आरक्षणाचा संदर्भ देत नेमकं काय म्हटलंय?

काय म्हणाले असीम सरोदे?

नगरसेवक फुटून एकनाश शिंदेंच्या शिवसेनेत गेले आहेत त्याबाबत विचारलं असता असीम सरोदे म्हणाले दोन तृतीयांश सदस्य जर बाहेर पडले तर त्यांच्यावर कारवाई होत नाही, ते नगरसेवक अपात्र ठरत नाहीत. ज्या पक्षातर्फे निवडणूक लढता तर त्या पक्षाचेच तुम्ही नगरसेवक असता. दुसऱ्या पक्षात गेल्यासही नगरसेवक अपात्र ठरतात. पक्षाने आदेश काढल्याविरुद्ध मतदान करणं, स्वतःहून पक्ष सोडणं असं असेल तर तो व्यक्ती अपात्र ठरु शकतो. निवडून आलेल्या जी संख्या आहे त्याच्या दोन तृतीयांश संख्येने नगरसेवक दुसऱ्या पक्षात गेले असतील तर त्यांच्यावर कारवाई होणार नाही. त्यापेक्षा कमी असेल तर मात्र अपात्रतेची कारवाई होऊ शकते असं असीम सरोदेंनी म्हटलं आहे. असीम सरोदेंनी टीव्ही ९ मराठीशी संवाद साधला त्यावेळी त्यांनी हे वक्तव्य केलं आहे.

…तर उद्धव ठाकरेंच्या पक्षाचा महापौर होऊ शकतो

महापौर पदाची सोडत २२ जानेवारीला आहे. एसटी प्रवर्गातलं आरक्षण लागलं तर काय होईल कारण एसटी प्रवर्गातला नगरसेवक शिंदेंची शिवसेना आणि भाजपा या दोन्ही पक्षांकडे नाही. असं विचारलं असता सरोदे म्हणाले, “महापौर या पदावर आरक्षण असण्याचं कारणच हे आहे की सगळ्या प्रवर्गातील लोकांना महापौर होता आलं पाहिजे. महापालिकेतलं उच्च स्थान आहे ते त्यांना भुषवता आलं पाहिजे. जात किंवा धर्माच्या नावावर विशिष्ट लोकांनाच हे पद मिळू नये यासाठी ही तरतूद करण्यात आली आहे. एसटी चे नगरसेवक एकनाथ शिंदे किंवा भाजपाकडे नसतील तर ज्या पक्षाकडे ते नगरसेवक असतील त्यांचा महापौर होईल. एसटी आरक्षण निघालं आणि तर उद्धव ठाकरेंच्या पक्षाचा महापौर होऊ शकतो, कारण त्यांच्याकडेच एसटी प्रवर्गातले नगरसेवक आहेत” असं उत्तर असीम सरोदेंनी दिलं आहे.

२२ जानेवारीला महापौरपदाच्या आरक्षणाची सोडत

राज्यातील २९ महानगरपालिकामधील महापौरपदाच्या आरक्षणाची सोडत २२ जानेवारी रोजी काढली जाणार आहे. २२ जानेवारीला सकाळी ११ वाजता सर्व महापालिकांसाठी महापौरपदाची आरक्षण सोडत काढली जाणार आहे. त्यामुळे कोणत्या प्रवर्गाचा महापौर कोणत्या नगरपालिकेमध्ये बसणार हे २२ जानेवारीला निश्चित होईल. नगरविकास विभागाकडून महापौरपदाच्या आरक्षणाची सोडत मंत्रालयात काढली जाईल.