Watch the viral trailer of Bharat Bhagya Vidhata Kangana Ranaut movie showcasing the real-life bravery of Anjali Kulthe nurse during 26 11 Mumbai attack: जवळपास २ वर्षांनंतर बॉलिवूडची क्वीन कंगना रणौत ‘भारत भाग्य विधाता’ या मोठ्या चित्रपटासह प्रेक्षकांच्या भेटीस येत आहे. २६ नोव्हेंबर २००८ च्या मुंबई दहशतवादी हल्ल्याच्या वेळी कामा हॉस्पिटलमध्ये घडलेल्या एका थरारक आणि सत्यघटनेवर हा चित्रपट आधारित आहे. आपल्या जिवाची पर्वा न करता कसाबसारख्या क्रूर दहशतवाद्यांसमोर २० गर्भवती महिलांचे प्राण वाचवणाऱ्या परिचारिका अंजली कुलथे यांची ही विस्मृतीत गेलेली कथा आहे.
इतिहास नायकों को भूल गया
ट्रेलरच्या सुरुवातीला मुख्य पात्रांची (कंगना रणौत , गिरिजा ओक आणि इतरांचा समावेश आहे) रोजची धडपड दाखवण्यात आली आहे. व्यवसायाने नर्स असलेल्या या महिलांना वैयक्तिक आणि व्यावसायिक पातळीवर साधा आदर आणि सहानुभूतीचे दोन शब्द मिळवण्यासाठीही संघर्ष करावा लागतो. …२६/११ ची रात्र त्यांच्यासाठी परीक्षेची होती. दहशतवाद्यांनी थेट कामा हॉस्पिटलवर हल्ला केला. चित्रपटाच्या ऑनलाईन जाहिरातीमध्ये म्हटले आहे की, “खबरों ने आतंक को याद रखा, लेकिन इतिहास नायकों को भूल गया। जब आतंक फैला, तो उन्होंने साहस को चुना। यह उन्हीं की कहानी है।”
थ्रिलर ड्रामा
मनोज तपडिया यांनी या थ्रिलर-ड्रामा चित्रपटाचे लेखन आणि दिग्दर्शन केले आहे. या चित्रपटात स्मिता तांबे, सुहिता थत्ते, आशा शेलार, प्रिया बेर्डे, ईशा डे, रसिका आगाशे, अमृता नामदेव, आदित्य मिश्रा आणि झाहीद खान अशी तगडी स्टारकास्ट पाहायला मिळणार आहे. या चित्रपटात मुख्य भूमिका साकारण्याबरोबच कंगना, शैलेश आर. सिंग, धवल गडा, बबिता आशिवाल आणि आदी शर्मा यांच्या सहकार्याने चित्रपटाची निर्मितीही करत आहे. १२ जून रोजी हा चित्रपट प्रदर्शित होणार आहे.
सामान्यांचे असामान्य धैर्य
२६ नोव्हेंबर २००८ हा मुंबईच्या इतिहासातील सर्वांत काळाकुट्ट दिवस मानला जातो. त्या रात्री पाकिस्तानच्या लष्कर-ए-तय्यबा या दहशतवादी संघटनेशी संबंधित दहशतवाद्यांनी मुंबईतील अनेक महत्त्वाच्या ठिकाणांवर हल्ले केले. छत्रपती शिवाजी महाराज टर्मिनस, ताज महाल पॅलेस हॉटेल, ओबेरॉय-ट्रायडेंट, नरीमन हाऊस, लिओपोल्ड कॅफे आणि कामा हॉस्पिटल परिसर या ठिकाणी गोळीबार, स्फोट आणि लोकांना ओलीस धरले. या हल्ल्यात अनेक निरपराध नागरिक मारले गेले, पोलीस अधिकारी आणि सुरक्षारक्षक हुतात्मा झाले. मात्र या भीषण अंधारात काही सामान्य माणसांनी असामान्य धैर्य दाखवले. त्यापैकी एक नाव म्हणजे अंजली कुलथे.
अचानक गोळीबार सुरू झाला…
अंजली कुलथे या मुंबईतील कामा अँड अल्बलेस हॉस्पिटल येथे परिचारिका म्हणून कार्यरत होत्या. २६/११ च्या रात्री त्या हॉस्पिटलच्या प्रसूती विभागात ड्युटीवर होत्या. त्या वेळी त्यांच्यावर सुमारे २० गर्भवती महिलांची जबाबदारी होती. बाहेर अचानक गोळीबाराचे आवाज सुरू झाले. सुरुवातीला नेमके काय घडत आहे, याची कुणालाच स्पष्ट कल्पना नव्हती. परंतु काही क्षणांत परिस्थिती गंभीर असल्याचे जाणवू लागले. दहशतवादी कामा हॉस्पिटलच्या परिसरात पोहोचले होते आणि रुग्णालयातील रुग्ण, कर्मचारी व सुरक्षारक्षक यांचा जीव धोक्यात आला होता.
मोठ्या जीवितहानीची शक्यता होती…
कामा हॉस्पिटल हे महिलांसाठी आणि मुलांसाठी महत्त्वाचे रुग्णालय आहे. अशा ठिकाणी दहशतवादी हल्ला होणे ही कल्पनाच भयावह होती. प्रसूती विभागातील महिला आधीच शारीरिक आणि मानसिकदृष्ट्या संवेदनशील अवस्थेत होत्या. काहींची प्रसूती जवळ आली होती, काहींना वेदना सुरू होत्या, तर काही जणींवर उपचार सुरू होते. अशा वेळी भीतीचे वातावरण निर्माण झाले असते, गोंधळ उडाला असता आणि त्या धक्क्यानेच मोठी जीवितहानी होण्याची शक्यता होती. मात्र अंजली कुलथे यांनी विलक्षण धैर्य, प्रसंगावधान आणि कर्तव्यनिष्ठा दाखवली.
रुग्णालयातील महिलांचे प्राण वाचवायचे होते…
गोळीबाराचे आवाज ऐकताच त्यांनी परिस्थितीचा अंदाज घेतला. त्यांनी तातडीने वॉर्डचे दरवाजे बंद केले, दिवे बंद केले आणि सर्व महिलांना शांत राहण्यास सांगितले. कोणताही आवाज होऊ नये, कुणी घाबरून पळू नये आणि दहशतवाद्यांचे लक्ष वॉर्डकडे जाऊ नये, याची त्यांनी पूर्ण काळजी घेतली. त्या स्वतः घाबरलेल्या असल्या तरी त्यांनी रुग्णांसमोर बिलकूल भीती दाखवली नाही. एक परिचारिका म्हणून त्यांच्या मनात त्या क्षणी फक्त एकच विचार होता, त्यांच्या रुग्णालयातील महिलांचे प्राण त्यांना वाचवायचे होते.
भीतीपेक्षा कर्तव्य श्रेष्ठ
या घटनेचे महत्त्व यासाठी अधिक मोठे आहे की, अंजली कुलथे यांच्याकडे त्या क्षणी कोणतेही शस्त्र नव्हते, कोणतीही सुरक्षा नव्हती आणि बाहेर काय चालले आहे याची पूर्ण माहितीही नव्हती. तरीही त्यांनी पळून जाण्याऐवजी रुग्णांसोबत राहण्याचा निर्णय घेतला. हा निर्णयच त्यांच्या व्यक्तिमत्त्वाचे मोठेपण दाखवतो. संकटकाळात माणूस स्वतःचा जीव वाचवण्याचा प्रयत्न करतो; पण अंजली कुलथे यांनी स्वतःच्या भीतीपेक्षा आपल्या कर्तव्याला प्राधान्य दिले.
वरिष्ठ पोलीस अधिकारीही शहीद झाले
त्या रात्री कामा हॉस्पिटल परिसरात मुंबई पोलीस दलातील वरिष्ठ अधिकारी हेमंत करकरे, अशोक कामटे आणि विजय साळसकर दहशतवाद्यांचा पाठलाग करताना शहीद झाले. त्यामुळे कामा हॉस्पिटल हा २६/११ हल्ल्याच्या इतिहासातील अत्यंत संवेदनशील आणि वेदनादायी भाग ठरतो. अशा भीषण वातावरणात अंजली कुलथे यांचे काम केवळ वैद्यकीय सेवा देण्याचे नव्हते; तर ते मानवी संरक्षणाचेही कार्य होते.
दहशतवादी कसाब विरुद्ध साक्ष दिली
अंजली कुलथे यांच्या धैर्याचा आणखी एक महत्त्वाचा पैलू म्हणजे त्यांनी नंतर न्यायप्रक्रियेतही भूमिका बजावली. २६/११ हल्ल्यात जिवंत पकडला गेलेला एकमेव दहशतवादी अजमल कसाब याच्या विरोधातील खटल्यात अनेक साक्षीदारांनी जबाब दिले. अंजली कुलथे यांनीही त्या काळातील घटनांबाबत महत्त्वाची साक्ष दिल्याचे विविध वृत्तांतांत नमूद आहे. दहशतवाद्यांचा सामना प्रत्यक्ष अनुभवलेल्या व्यक्ती म्हणून त्यांची साक्ष महत्त्वाची ठरली.
रुग्णांच्या काळजीला महत्त्व
अंजली कुलथे यांची कथा आपल्याला आरोग्यसेवा क्षेत्रातील कर्मचाऱ्यांचे खरे महत्त्व समजावते. डॉक्टर, परिचारिका, वॉर्डबॉय, तंत्रज्ञ आणि इतर आरोग्यसेवा कर्मचारी अनेकदा संकटाच्या काळात पहिल्या रेषेवर उभे असतात. युद्ध असो, महामारी असो, नैसर्गिक आपत्ती असो किंवा दहशतवादी हल्ला रुग्णालयातील कर्मचारी स्वतःच्या सुरक्षिततेपेक्षा रुग्णांच्या काळजीला प्राधान्य देतात. अंजली कुलथे या त्या परंपरेचे प्रेरणादायी उदाहरण आहेत.
मानवतेची सेवा करणाऱ्या अदृश्य नायक
त्यांच्या कृतीतून तीन गोष्टी स्पष्ट दिसतात. पहिली म्हणजे कर्तव्यनिष्ठा. त्यांनी परिचारिका म्हणून घेतलेली जबाबदारी संकटाच्या क्षणी सोडली नाही. दुसरी म्हणजे प्रसंगावधान. घाबरून न जाता त्यांनी योग्य निर्णय घेतले. तिसरी म्हणजे मानवी संवेदनशीलता. त्या महिलांपैकी प्रत्येकजण एका नव्या जीवाला जन्म देण्याच्या अवस्थेत होती. त्या महिलांचे आणि त्यांच्या अजन्मा बाळांचे रक्षण करणे ही केवळ नोकरी नव्हती, ती मानवतेची सेवा होती. अशा कथा अनेकदा मोठ्या राजकीय किंवा सुरक्षा चर्चांमध्ये मागे पडतात. २६/११ म्हटले की, आपल्याला ताज हॉटेल, एनएसजी कमांडो, पोलीस अधिकारी आणि दहशतवाद्यांची नावे आठवतात. पण त्या रात्री रुग्णालयांत, रेल्वे स्थानकांवर, हॉटेलांत आणि रस्त्यांवर अनेक सामान्य नागरिकांनीही असामान्य धैर्य दाखवले, त्यांची आठवण नसते. अंजली कुलथे यांचे नाव या अदृश्य नायकांमध्ये अग्रस्थानी घ्यावे लागेल.
