उत्तर कोरियाची सूत्रे १३ वर्षांच्या मुलीकडे? किम जोंग उन यांच्यानंतर पुढील हुकूमशहा कोण?

२०११ मध्ये किम जोंग-इल यांच्या निधनानंतर त्यांचे पुत्र किम जोंग-उन यांनी उत्तर कोरियाची सूत्रे आपल्या हाती घेतली होती. त्याआधी १९९४ मध्ये किम इल सुंग यांच्या निधनानंतर किम जोंग इल यांनी देशाच्या कारभाराची धुरा सांभाळली होती. यादरम्यान उत्तर कोरियाचे सध्याचे हुकूमशहा किम जोंग-उन यांनी त्यांची कन्या ‘किम जू ए’ हिला आपला वारसदार म्हणून घोषित केल्याचे वृत्त समोर येत आहे. १३ वर्षीय मुलीची सार्वजनिक कार्यक्रमांमधील उपस्थिती पाहता उत्तर कोरियाची सूत्रे तिच्याच हाती असणार असा अंदाजही अनेकांनी बांधला आहे.

किम इल-सुंग कोण होते?

किम इल-सुंग हे उत्तर कोरियाचे संस्थापक मानले जातात. त्यांचा जन्म १५ एप्रिल १९१२ रोजी प्योंगयांगजवळील मानग्योंगडे येथे झाला. किम इल-सुंग यांनी आपले प्राथामिक शिक्षण पूर्ण केल्यानंतर कम्युनिस्ट चळवळीत सहभाग घेतला होता. या कारणामुळे त्यांना कारावासही भोगावा लागला होता. तुरुंगातून सुटका झाल्यानंतर त्यांनी जपानी अतिक्रमणाविरोधात भूमिका घेतली होती. यादरम्यान ते सोव्हियत युनियनमध्ये सामील झाले आणि तिथे त्यांनी कम्युनिस्ट पक्षात प्रवेश केला. इतक्यावरच न थांबता किम इल-सुंग यांनी दुसऱ्या महायुद्धादरम्यान सोव्हियत युनियनच्या कोरियन रेजिमेंटमधील वरिष्ठ पदावर काम केले. १९४८ पासून १९९४ पर्यंत त्यांनी उत्तर कोरियावर राज्य केले. १९९४ मध्ये किम इल-सुंग यांचे हृदयविकाराच्या तीव्र झटक्याने निधन झाले.

आणखी वाचा : वर्षभरात सोन्याचा भाव तब्बल ८० टक्क्यांनी वाढला; सराफा व्यावसायिक मोठ्या अडचणीत, कारण काय?

किम जोंग-इल : उत्तर कोरियाचे कठोर शासक

१६ फेब्रुवारी १९४२ ला जन्मलेल्या किम जोंग-इल यांनी वडिलांच्या निधनानंतर उत्तर कोरियाची सूत्रे आपल्या हाती घेतली. ऑक्टोबर १९८० मध्येच त्यांना किम इल-सुंग यांचे राजकीय वारसदार म्हणून घोषित करण्यात आले होते. १९९०-९१ मध्ये किम जोंग-इल यांनी सशस्त्र दलांचे नेतृत्व स्वीकारले आणि केंद्रीय समितीसह पक्ष सचिवालयात अनेक महत्त्वाची पदे भूषवली होती. टाइम मॅगझिनच्या वृत्तानुसार, ‘डिअर लीडर’ म्हणून ओळखले जाणारे जोंग-इल चित्रपटप्रेमी होते. त्यांच्याकडे २०,००० हून अधिक चित्रपटांच्या व्हिडीओचा संग्रह होता. आपल्या राजवटीच्या काळात त्यांनी अनेक अभिनेते व दिग्दर्शकांचे अपहरण केल्याचे सांगितले जाते. त्यांच्या काळात पडलेल्या भयंकर दुष्काळामुळे उत्तर कोरियातील लाखो लोकांचा मृत्यू झाला होता. किम जोंग-इल यांनी गुप्तपणे देशाच्या अण्वस्त्र महत्त्वाकांक्षेला खतपाणी घातले. त्यांच्या नेतृत्वाखाली उत्तर कोरियाने ऑक्टोबर २००६ मध्ये आपली पहिली अधिकृत अणुचाचणी केली होती.

किम जोंग-उन कसे सत्तेत आले?

उत्तर कोरियाचे सध्याचे हुकूमशहा किम जोंग-उन यांचा जन्म ८ जानेवारी १९८४ रोजी झाला. २०११ मध्ये किम जोंग-इल यांचे हृदयविकाराच्या झटक्याने निधन झाल्यानंतर त्यांनी देशाची सूत्रे आपल्या हाती घेतली. किम जोंग इल यांचे सर्वात धाकटे पुत्र असलेले किम जोंग-उन हे उत्तर कोरियाचा कारभार सांभाळणार यांची कल्पना कुणीही केली नव्हती, कारण लहानपणापासूनच वडिलांनी त्यांना प्रसारमाध्यमांपासून दूर ठेवले होते. सत्तेवर आल्यानंतर त्यांच्यात देशातील प्रशासकीय यंत्रणांवर पकड मिळवण्याची क्षमता आहे की नाही, याबाबतही अनेकांना सांशकता होती. मात्र, किम जोंग-उन यांनी सर्वांचे अंदाज फोल ठरवत अत्यंत जबाबदारीने देशाची सूत्रे सांभाळली.

किम जोंग-उन यांचे कठोर निर्णय

२०१३ मध्ये किम जोंग-उन यांनी त्यांचे काका जांग सोंग थाएक यांना सर्वांसमोर फासावर लटकवले. देशातील सर्वात शक्तिशाली व्यक्तींपैकी एक मानल्या जाणाऱ्या सोंग थाएक यांच्या फाशीने सगळ्या जगाला हादरवून टाकले होते. त्यांच्या नेतृत्वाखाली उत्तर कोरियाने अण्वस्त्र आणि बॅलिस्टिक क्षेपणास्त्र कार्यक्रमात मोठी वाढ केली आहे. देशांतर्गत दडपशाही सुरू असतानाच आंतरराष्ट्रीय पातळीवर त्यांनी काही परदेशी नेत्यांशी संबंध वाढवण्याचाही प्रयत्न केला आहे. यामध्ये अमेरिकेचे राष्ट्राध्यक्ष डोनाल्ड ट्रम्प आणि रशियाचे अध्यक्ष व्लादिमीर पुतिन यांसारख्या मोठ्या नेत्यांचा समावेश आहे. किम जोंग-उन यांना त्यांच्या वडिलांपेक्षा देशात अधिकच लोकप्रियता मिळाली आहे. त्यांनी घेतलेल्या शेतकऱ्यांच्या हितांच्या निर्णयांमुळे अनेकजण भारावून गेले आहेत.

किम जोंग-उन यांच्या राजघराण्यात कोण?

किम जोंग-उन यांची धाकटी बहीण किम यो जोंग यांना उत्तर कोरियातील सर्वात शक्तिशाली महिला मानले जाते. त्यांनी अनेकदा दक्षिण कोरिया आणि अमेरिकेला धमकणारी निवेदने प्रसिद्ध केलेली आहेत. किम घराण्यातील राजवटीत किम यो जोंग केंद्रस्थानी असली तरीही देशातील सर्वोच्च पदापासून तिला दूर ठेवण्यात आले आहे. दुसरीकडे- किम जोंग उन यांचे मोठे बंधू किम जोंग चुल यांनी राजकारणापासून दुरावा ठेवलेला आहे. त्यांच्यात हुकूमशहासाठी लागणारी क्रूरता नाही आणि त्यांनी कोणतेही राजकीय पद भूषवलेले नाही. किम जोंग नाम हे किम जोंग-इल यांचे थोरले पुत्र होते आणि त्यांना राजघराण्याचे वारसदार मानले जात होते. २००१ मध्ये बनावट पासपोर्ट वापरून जपानमध्ये प्रवेश करण्याचा प्रयत्न करताना त्यांना पकडण्यात आले, तेव्हापासून ते वडिलांच्या नजरेतून उतरले आणि त्यांना उत्तर कोरियाबाहेर हाकलून देण्यात आले. २०१७ मध्ये त्यांची Kuala Lumpur International Airport Malaysia येथे हत्या झाली. त्यांच्या हत्येमागे उत्तर कोरियाच्या हुकूमशहांचाच हात असल्याचे सांगितले जाते. किम जोंग-उनची यांच्या पत्नी- री सोल-जू अनेकदा लष्करी परेड आणि सांस्कृतिक कार्यक्रमांमध्ये दिसत असल्या तरीही त्यांना राजकीय वारसदार मानले जात नाही.

हेही वाचा : स्मार्ट चष्म्यांचा वापर करून गुप्त चित्रीकरण; महिलांमध्ये भीतीचे वातावरण, नेमकं काय आहे प्रकरण?

किम जोंग उन यांची मुलगी कोण?

किम जोंग-उन यांची १३ वर्षांची मुलगी किम जु-ए उत्तर कोरियाची पुढची हुकूमशहा असेल असा अंदाज वर्तवण्यात आला आहे. नोव्हेंबर २०२२ मध्ये किम जोंग-उन यांनी पहिल्यांदा त्यांच्या मुलीची सर्वांसमोर ओळख करून दिली होती. त्यानंतर किम जु-ए अनेक माध्यमांवर वारंवार दिसू लागली. देशाच्या लष्करी आणि औपचारिक कार्यक्रमांमध्ये ती नेहमीच आपल्या वडिलांबरोबर सार्वजनिक मंचावर उपस्थित असते. किम जोंग-उन यांनी उत्तर कोरियामधील माध्यमांवर कडक निर्बंध घातलेले आहेत, त्यामुळे प्रसारमाध्यमांनी कधीही किम जु-एचे नाव घेतलेले नाही. ती केवळ नेत्याची सर्वात लाडकी मुलगी किंवा आदरणीय कन्या या नावानेच ओळखली जाते. विशेष बाब म्हणजे- सार्वजनिक कार्यक्रमात तिचा आवाज कुणीही ऐकलेला नाही. उत्तर कोरियामध्ये आजपर्यंत केवळ पुरुषांनीच सत्ता सांभाळली आहे, त्यामुळे किम जु-ए हिची देशाच्या सर्वोच्चपदी निवड झाल्यास तो मोठा बदल मानला जाईल. किम जोंग-उन यांच्या इतर मुलांबद्दल फारशी माहिती नाही. गुप्तचर यंत्रणांनी दावा केला आहे की- उत्तर कोरियाच्या हुकूमशहांना आणखी एक मुलगा आणि एक मुलगी असून त्यांची माहिती गुपित ठेवण्यात आलेली आहे.