पाच वेळच्या विश्वविजेत्या ब्राझीलने शानदार कामगिरी करत फिफा विश्वचषकाच्या 'इ' गटात सर्बियाला २-० ने नमवत बाद फेरीत प्रवेश केला आहे. या विजयाबरोबर ब्राझीलने 'इ' गटात अव्वल स्थान पटकावले. ब्राझीलचा आता उप-उपांत्य फेरीत मेक्सिकोशी सामना होईल. याच गटातून बादफेरी गाठणारा दुसरा संघ स्वित्झर्लंड ठरला. कोस्टा रिकाबरोबर झालेला त्यांचा सामना २-२ असा बरोबरीत सुटला. सामन्याच्या सुरूवातीपासूनच ब्राझीलने आपली पकड राखली होती. पॉलिन्होने ३६ व्या मिनिटाला ब्राझीलला खाते उघडून दिले आणि ही आघाडी हाफ टाईमपर्यंत कायम राखली. दुसऱ्या हाफमध्ये सर्बियाने काही संधी मिळवल्या. पण ब्राझीलच्या संरक्षक फळीला भेदण्यात त्यांना यश आले नाही. ब्राझीलचा स्टार खेळाडू नेमारकडेही गोल करण्याची काहीवेळा संधी आली. पण गोल करण्यात तो यशस्वी ठरला नाही. थिआगो सिल्वाने नेमारच्या पासवर ६८ व्या मिनिटाला शानदार गोल करत २-० ने आघाडी कायम ठेवली. हेच अंतर सामन्याच्या अखेरीपर्यंत कायम राहिले. ब्राझीलने यंदाच्या विश्वचषकातील स्वित्झर्लंड विरूद्धचा आपला पहिला सामना १-१ असा बरोबरीत राखला होता. दुसऱ्या सामन्यात त्यांनी कोस्टारिकाला २-० ने पराभूत केले. तर सर्बियाने आपल्या पहिल्या सामन्यात कोस्टारिकाला १-० ने पराभूत केले तर दुसऱ्या सामन्यात स्वित्झर्लंडकडून त्यांना १-२ ने पराभव स्वीकारावा लागला होता.