क्रोएशियाने फिफा विश्वचषकाच्या साखळी फेरीच्या अखेरच्या सामन्यात आईसलँडला २-१ ने पराभूत करून बादफेरीत प्रवेश केला. क्रोएशियाने या विजयापूर्वीच बादफेरीतील आपले स्थान निश्चित केले होते. हा सामना क्रोएशियासाठी औपचारिकतेचा भाग होता. साखळी फेरीत या संघाने एकही सामना गमावला नाही. त्यांनी ३ पैकी २ सामन्यात विजय तर एक सामना बरोबरीत ठेवत ७ गुण पटकावले होते. तर आईसलँडला ३ पैकी २ सामन्यात पराभवाला सामोरे जावे लागले. २ गुणांसह ते गुणतक्त्यात अखेरच्या स्थानी राहिले. बादफेरीत क्रोएशियाची आता डेन्मार्कशी लढत होईल. क्रोएशिया आणि आईसलँड यांच्यात खेळल्या गेलेल्या या सामन्यातील पहिला हाफ हा विना गोल पार पडला. त्यानंतर दुसऱ्या हाफमध्ये ३ गोल झाले. क्रोएशियाच्या मिलान बेडेलने ५३ व्या मिनिटाला गोल करत आपल्या संघाचे खाते उघडले. आईसलँडचा जी. सिगर्डसनने ७६ व्या मिनिटाला पेनल्टीवर गोल करत संघाला १-१ अशी बरोबर साधून दिली. त्यानंतर ९० व्या मिनिटाला पेरेसिचने गोल करत क्रोएशियाला २-१ अशी आघाडी मिळवून दिली. हीच आघाडी क्रोएशियासाठी निर्णायक ठरली. क्रोएशियाने आपल्या पहिल्या सामन्यात नायजेरियाचा २-०ने पराभव केला होता. त्यानंतर मेसीचा संघ अर्जेंटिनाला ३-०ने असा एकतर्फी धुव्वा उडवला होता. तर आईसलँडने यापूर्वी अर्जेंटिनाबरोबर १-१ असा सामना बरोबरीत ठेवला होता. तर नायजेरियाचा २-०ला पराभूत केले होते.
