यजमान रशियाने फिफा वर्ल्ड कप- २०१८ च्या सलामीच्या सामन्यात सौदी अरेबियाचा ५-० ने दणदणीत पराभव केला. रशियाच्या युरी गाजिंस्कीने यंदाच्या विश्वचषकातील पहिला गोल करण्याचा मान मिळवला. या गोलच्या साहाय्याने त्याने रशियाला सौदी अरेबियाविरोधात १-० ने आघाडी मिळवून दिली. २८ वर्षीय युरी गाजिंस्कीने लुज्निकी स्टेडिअमध्ये खेळल्या गेलेल्या प्रारंभीच्या सामन्यातील १२ व्या मिनिटाला गोल केला. या गोलनंतर स्टेडिअममधील ८० हजार प्रेक्षकांनी एकच जल्लोष केला. त्यानंतर ४३ व्या मिनिटांला २७ वर्षीय डेनिस चेरिशेवने गोल केला आणि यजमान रशियाला २-० ने आघाडी मिळवून दिली. त्याचबरोबर या विश्वचषकातील राखीव खेळाडू म्हणून गोल करणारा डेनिस हा पहिला खेळाडू ठरला आहे. त्यानंतर दुसरा राखीव खेळाडू एरटेम डेज्यूबाने ७१ व्या मिनिटाल गोल करून रशियाला ३-०ने आघाडी मिळवून दिली. खेळाच्या अखेरच्या क्षणी रशियाने एकामागोमाग एक असे दोन गोल केले.