किंग्ज इलेव्हन पंजाबने राजस्थान रॉयल्सला सुपर ओव्हरमध्ये पराभूत करत साऱ्यांनाच धक्का दिला. पंजाबचा कर्णधार वीरेंद्र सेहवागने या विजयाचे श्रेय मिचेल जॉन्सन आणि अक्षर पटेल यांना दिले आहे. बिनीचे फलंदाज बाद झाल्यावरही या दोघांनी संघाला बरोबरी करून दिली, तर जॉन्सनने सुपर ओव्हरमध्ये चमकदार कामगिरी करत संघाच्या विजयावर शिक्कामोर्तब केले होते.‘‘आमच्यासाठी हा एक आनंदाचा क्षण आहे. जॉन्सनने अप्रतिम गोलंदाजी केली, त्याचबरोबर जॉन्सन आणि अक्षर या दोघांनी दमदार फलंदाजी करत संघाला विजयपथावर नेण्यात मोलाची भूमिका बजावली,’’ असे सेहवाग म्हणाला.
