आपल्या पहिल्या विजेतेपदाचं स्वप्न उराशी घेऊन मैदानात उतरलेल्या RCB च्या संघाचं पुन्हा एकदा स्वप्न भंगलं आहे. अबु धाबीच्या मैदानावर झालेल्या सामन्यात हैदराबादने विराट कोहलीच्या रॉयल चॅलेंजर्स बंगळुरुवर ६ गडी राखून मात केली. या पराभवासह RCB चं स्पर्धेतलं आव्हानही संपुष्टात आलं आहे. विजयासाठी दिलेलं १३२ धावांचं हैदराबादकडून विल्यमसन-होल्डरने संयमी फलंदाजी करत पूर्ण केलं. विल्यमसनने नाबाद अर्धशतक झळकावत संघाच्या विजयात मोलाचा वाटा उचलला. अखेरच्या षटकापर्यंत मैदानावर टिकून राहत विल्यमसनने नाबाद ५० धावा केल्या. त्याला होल्डरने २४ धावा करत मोलाची साथ दिली. RCB ने विजयासाठी दिलेल्या १३२ धावांचं आव्हान पार करण्यासाठी मैदानात उतरलेल्या हैदराबादच्या संघाची सुरुवातही खराब झाली. मोहम्मद सिराजने आपल्या पहिल्याच षटकात श्रीवत्स गोस्वामीला माघारी धाडलं. यानंतर मैदानात आलेल्या मनिष पांडेने आपला कर्णधार डेव्हिड वॉर्नरची उत्तम साथ देत संघाचा डाव सावरला. दोन्ही फलंदाजांनी RCB च्या गोलंदाजांचा सावधपणे सामना करत धावफलक हलता ठेवला. खेळपट्टी जलदगती गोलंदाजांना मदत करत असल्याचं पाहून RCB चा कर्णधार विराटने सिराज आणि सैनीवर जबाबदारी सोपवली. अखेरीस मोहम्मद सिराजने पुन्हा एकदा आपल्या कर्णधाराचा विश्वास सार्थ ठरवत डेव्हिड वॉर्नरला माघारी धाडलं. दुसऱ्या विकेटसाठी वॉर्नरने पांडेसोबत ४१ धावांची भागीदारी केली. यानंतर हैदराबादच्या डावालाही गळती लागली. मनिष पांडेही झॅम्पाच्या गोलंदाजीवर मोठा फटका खेळण्याच्या प्रयत्नात माघारी परतला. त्याने २४ धावा केल्या. युवा प्रियम गर्गही फारशी चमक दाखवू शकला नाही. चहलने त्याला आपल्या जाळ्यात अडकवत हैदराबादला आणखी एक धक्का दिला. एका बाजूला अनुभवी केन विल्यमसनने सावध खेळ करत डाव सावरला होता. जेसन होल्डरला सोबत घेऊन विल्यमसनने फटकेबाजी करत हैदराबादचा संघ सामन्यात पिछाडीवर पडणार नाही याची काळजी घेतली. RCB च्या गोलंदाजांनीही हैदराबादच्या फलंदाजांना चांगली टक्कर देत शेवटच्या दोन षटकांत विजयासाठी १८ धावांचं आव्हान दिलं. अखेरच्या षटकात विजयासाठी ८ धावा हव्या असताना होल्डरने दोन चौकार लगावत हैदराबादच्या विजयावर शिक्कामोर्तब केलं. बंगळुरुकडून मोहम्मद सिराजने २ तर झॅम्पा आणि चहलने प्रत्येकी १-१ बळी घेतला. त्याआधी, जेसन होल्डर, टी. नटराजन आणि इतर गोलंदाजांच्या भेदक माऱ्यामुळे करो या मरो च्या सामन्यात RCB चा संघ फक्त १३१ धावांपर्यंत मजल मारु शकला. साखळी फेरीत सलग ४ पराभव पदरात पडलेल्या RCB च्या संघाची निराशाजनक कामगिरी या सामन्यातही कायम राहिली. एबी डिव्हीलियर्सचा अपवाद वगळता RCB चा एकही फलंदाज हैदराबादच्या गोलंदाजांचा सामना करु शकला नाही. डिव्हीलियर्सने एकाकी झुंज देत अर्धशतकी खेळी करत संघाला सन्मानजनक धावसंख्या गाठून दिली. हैदराबादकडून जेसन होल्डरने ३, टी. नटराजनने २ तर शाहबाज नदीमने १ बळी घेतला. नाणेफेक जिंकून हैदराबादचा कर्णधार डेव्हिड वॉर्नरने प्रथम गोलंदाजी करण्याचा निर्णय घेतला. सलग ४ सामन्यांत पराभवाचा सामना केल्यानंतर RCB ने संघात ४ बदल केले. इतकच नव्हे तर कर्णधार विराट कोहली स्वतःला फलंदाजीसाठी सलामीला आला. परंतू RCB चा हा प्रयोग पुरता फसला. दुसऱ्याच षटकात जेसन होल्डरने विराट कोहलीला यष्टीरक्षक श्रीवत्स गोस्वामीकरवी झेलबाद केलं, त्याने ६ धावा केल्या. महत्वाच्या षटकांत धावा होत नसल्यामुळे दबावाखाली आलेला देवदत पडीकलही लगेचच माघारी परतला. होल्डरच्या गोलंदाजीवर प्रियम गर्गने त्याचा सुरेथ झेल घेतला. RCB चा संघ संकटात सापडलेला असताना फिंच आणि डिव्हीलियर्स यांनी महत्वपूर्ण भागीदारी करत संघाचा डाव सावरला. दोन्ही फलंदाजांनी तिसऱ्या विकेटसाठी ४१ धावांची भागीदारी केली. RCB ची ही जोडी मैदानावर स्थिरावतेय असं वाटत असताना शाहबाद नदीमने फिंचला आपल्या जाळ्यात अडकवत RCB ला तिसरा धक्का दिला. फिंचने ३२ धावांची खेळी केली. यानंतर त्याच षटकात मोईन अली फ्रि-हीटवर चोरटी धाव घेताना धावबाद होऊन माघारी परतला. एकीकडे डिव्हीलियर्सने संघाचा मोर्चा सांभाळात फटकेबाजीचा प्रयत्न केला. परंतू दुसऱ्या बाजूने इतर फलंदाजांची त्याला म्हणावी तशी साथ मिळाली नाही. सोळाव्या षटकात RCB ने शतकी धावसंख्येचा टप्पा ओलांडला. याच षटकात चौकार लगावत डिव्हीलियर्सने आपलं अर्धशतकही झळकावलं. अखेरच्या षटकांत फटकेबाजी करण्याच्या नादात डिव्हीलियर्सची नटराजनच्या यॉर्कर चेंडूवर माघारी परतला. त्याने ५६ धावांची खेळी केली. यानंतर तळातल्या फलंदाजांनी RCB ला १३१ धावांचा टप्पा गाठून दिला.