श्रेयस अय्यरच्या नेतृत्वाखाली दिल्ली कॅपिटल्सचा संघ यंदाच्या हंगामात आतापर्यंत चांगली कामगिरी करतो आहे. काही दिवसांपूर्वी संघाचा अनुभवी फिरकीपटू अमित मिश्राला बोटाला झालेल्या दुखापतीमुळे स्पर्धेतून माघार घ्यावी लागली होती. आपल्या संघातील अनुभवी खेळाडूला दिल्लीच्या खेळाडूंनी अलविदा करत, त्याचे आभार मानले आहेत. युएईवरुन अमित मिश्रा आता भारतात परतणार आहे. KKR विरुद्ध सामन्यात अमित मिश्राला दुखापत झाली होती. दिल्ली कॅपिटल्सचा कर्णधार श्रेयस अय्यरने अमित मिश्राला निरोप देण्याआधी त्याचे आभार मानले. हा व्हिडीओ दिल्ली कॅपिटल्सने सोशल मीडियावर पोस्ट केला आहे. आयपीएलच्या इतिहासात १६० बळी घेणारा अमित मिश्रा हा दिल्लीचा सर्वात अनुभवी गोलंदाज मानला जातो. आपल्याला झालेली दुखापत लवकर बरी होईल अशी मिश्राला आशा होती. परंतू स्पर्धेतून माघार घ्यावी लागत असल्यामुळे मिश्राने हतबल असल्याची भावना बोलून दाखवली. तेराव्या हंगामात दिल्लीचा पुढचा सामना शुक्रवारी राजस्थान रॉयल्सविरुद्ध शारजाच्या मैदानात रंगणार आहे.
